Kristian Jeremiassen: Akitsuusersuinissaq isumaqataaffiginngilara!

Qamuteralaat maskiinallu sanaartornermi atorneqartartut akitsuusersuiffigineqarnissaat Naalakkersuisut siunnersuutigaat.  

Inatsisartuni ilaasortaq aamma aningaasaqarnermut akileraartarnermullu ataatsimiitsitaliami ilaasortap, Kristian Jeremiassenip Siumumeersup qamuteralannik akitsuusersuinissaq tapersersunngilaa.

- Pissusissamisuunngilaq qamuteralaat biilillu sanilliunneqarniarnerat. Taamaattumik isumaqatigisinnaanngilara qamuteralaat akitsuusersuiffiginissaannut Naalakkersuisut siunnersuutaat, Kristian Jeremiassen oqarpoq.

Ilanngullugu eqqaavaa qamuteralaat piffissap ilaannaani angalasarmata nunakkoorutaannartullu atorneqartarmata biilinut sanilliullugit akitsuusersuiffigineqassappata tulluartuunngitsoq.

Aningaasaqarnermut akileraartarnermullu ataatsimiitsitaliami siulittaasoq Jens Emanuelsen Radioaviisimit aamma oqaloqatigaarput, taassumalu akitsuusersinissaq eqqartorneqarluaqqaartinnagu oqaaseqarfigerusunngilaa.

Inuit Ataqatigiinninngaanniit Aqqaluaq B. Egedep Kristian Jeremiassenitulli aningaasanik 8-10 millioninik akitsuusersuisuinikkut aallertoqarnissaq isumaqataaffiginngilaa.

-Soorunami Inuit Ataqatigiinninngaanniit tupaaallaatigivarput maannakkut naalakkersuisooqatigiit illuatungiliuttuunermi nalaani ajorilluinnaqqissaarlugu tikkuartortarnikuusaat, tassaavoq akitsuutinik pilersitsisarneq. Massakkullu akitsuutit perlisinnikuusagut qaangerujussuarlugit pilersitsiniarput. Taavalu aamma qaavatigut qamuteralaat traktorinillu allanillu akitsuusersuiniarnerminni aamma nutaamik saqqummiussaqarlutik, Inatsisartuni ilaasortaq Aqqaluaq B. Egede taama oqarpoq.

Aamma inuiaqatigiinni oqallinnissaq pisariaqartippaa.

-Inatsisartuni ataasimiinnerni tulleriinni annertuunik allannguutissanik siunnersuuteqaannartarput. Taamaalilluni oqallinneq pinngitsoortarpoq inuiaqatigiinni. Tamanna isumaqatiginngilarput, Aqqaluaq B. Egede oqarpoq.

Naalakkersuisooqatigiinni Atassutip siulittaasua Gerhardt Petersen aamma isumaqarpoq aqqusinermi angallattartut kisimik akitsuusersuiffigineqartariaqartut.