Kristian Enoksenip ataatsimoorluni suleqatigiinnissaq anguniarniarpaa

Siumup inuusuttaanni siulittaasunngortoq, 29-nik ukiulik Kristian Enoksen, ataatsimoorluni suleqatigiinnissamik siunniussivoq, ilaasortassarsiornissarlu pimoorunniarlugu.

-Ataatsimoorluta suleqatigiinnissaq anguniasallugu siunnerfigivara, taavalu Siumup nutarternera ilutigalugu malittarisassatta nutarterneqarnissaat siulersuisunngortugut aamma sulissutigissavarput. Kristian Enoksen oqarpoq.

Partiip iluani ataqatigiinnerunissaq siulersuisunut qineqqusaartut oqaatigisimammassuk ataqatigiipallaanngissimanersut Kristian enoksen aperineqrami akivoq:

-Taama isumaqanngilanga. Siumup iluani ammasuuvugut, qanorluunniit oqarsinnaatitaalluta.

Siumup Kujataani immikkoortortai amerlavallaanngimmata amerlisarniassanerai Siumup Inuusuttaasa siulittaasortaavat aamma aperineqarpoq, akivorlu:

-Nuna tamakkerlugu immikkootortaqarfinnik pilersitsiortornissarput eqqarsaatigaarput, aamma pilerigisorujussuuvarput kommunerujussuanngornissani uagut tassani aamma naleqqussaqataassasugut, nukittuumik saqqummernissarput eqqarsaatigalugu, Kristian Enoksen taama oqarpoq. Taassumalu siulittaasutut tullerilerpaa, maannamut siulittaasuusimasoq, Mads Petersen. Siulersuisunullu ilaasortanngorngortut allat tassaapput, Doris Jakobsen, Linda Jerimiassen, Andreas Poulsen, Paninnguaq Petersen aamma najuunnani qinigassanngortittoq Mikael Petersen, Nuummeersoq.

Namminersulivinnissap inuusuttunit isummersorfigineqarnissaa anguniarlugu immikkoortortaqarfinni oqallitsitsisalernissaq aamma anguniarneqartoq oqaatigineqarpoq.