Nunatsinni ilisarisimaneqarluartoq Kristian Egede, Kajstiaat, Nuuk, 77-inik ukioqarluni ippassaq januaarip 31-anni 2007 toqukkut qimaguppoq.
Kajstiaat aliikkusersuisartutut nunatsinni ilisarisimaneqarlualerpoq, pingaartumik Kalaallit Nunaata Radioa aqqutigalugu. 1950-ikkunnilimi Nuummi pilersippaa peqatigiiffik naalisarlugu NAIP, tassa Nuummi Aliikkusersuisartut Isiginnaartitsisartullu Peqatigiiffiat.
Aliikkusersuisartutut nunarput tamangajaat angallavigisarpaa, aammalu Danmarkimut nunanullumi allanut angalasarsimalluni.
KNR-imi pigineqarput alikkusersuinerpassuit peqataaffigisimasaasa immiunneqarneri, soorlu eqqaaginnartigik aallakaatitassiat “Piginnaanillit qaagitsi”, “Aliikkusiarfik”, “Ukioq naagujoq”, il.il.
Kajstiaattaaq suliniuteqaqataaneratigut Nuummi “Kalaaliaraq” pilersinneqarpoq.
Kristian Egedep qimatarai nulii Jakobine, qitornatik, ernuttatik ernutaqqiutitillu.