CIA-p tigusanik timmisartuussisarsimaneranik arlaannut attuumassuteqanngitsumik misissuisitsinissamik qallunaat naalagaaffianut Naalakkersuisut piumasaqarnerat folketingemi partiit, Kristendemokraatit aamma SF-p tapersersorpaat.
Kalaallit Nunaanni Naalakkersuisut qallunaat naalagaaffiannut arlaannut attuumassuteqanngitsumik CIA-p tigusanik timmisartuussisarsimanera pillugu misissuisitsinissamik piumasaqarnerat, Kalaallit Nunaat pillugu oqaaseqartartup Kristendemokraatininngaanneersup Per Ørum Jørgensenip, aamma Kalaallit Nunaat pillugu oqaaseqartartup Kristen Touborgip, SF-imeersup tamarmik tapersersorpaat.
Kristen Touborg oqarpoq qallunaat naalagaaffiat timmisartuussisarsimanerit pillugit imminut misissuiffigisinnaanngitsoq.
- SF-imiit nuannaarutigalugu Naalakkersuisut arlaannut attuumassuteqanngitsumik misissuisitsinissamik piumasaqarnerat tapersersorparput. Kuupik Kleist isumaqatigilluinnarpara, arlaannaannilluunniit unioqqutitsisoqarsimanngippat isertuussassaqartoqaranilu, taava qallunaat naalagaaffiannik aamma amerikamiunik pinngitsuutitsinermik kinguneqassaaq.
- Tamannali eqqortumik ilisimaneqarsinnaanngilaq misissuisoqaqqaartinnagu. Ataatsimut isigalugu qallunaat naalagaaffiata imminut misissuiffisarnera isumaqatiginngilarput, Kristen Touborg oqarpoq.
Per Ørum Jørgensenip Krstendemokraatineersup Naalakkersuisut taamatut avammut nalunaaruteqarnerat tapersersorpaa. Taanna neriuppoq Naalakkersuisut siulittaasuat Kuupik Kleist aamma statsminister Lars Løkke Rasmussen aaqqiissutissamik piaartumik nassaarumaartut.
- Namminersorlutik Oqartussat aamma qallunaat naalagaaffiat pisoq pillugu isumaqatigiissinnappata, taava tamanna tapersersussavarput. Qallunaat naalakkersuisuisa nalunaaruteqartarnerat malillugu, paasissutissat tamarmik saqqummiunneqarnikuupput. Taamaattumik takusinnaanngilara sooq qallunaat naalakkersuisui isertuussaqassanersut. Isumaqarpunga Kuupik Kleist aamma Lars Løkke Rasmussen aaqqiissutissamik piaartumik nassaassasut, Per Ørum Jørgensen oqarpoq.
