Kreditkortinik atornerlueriartartut tusarsaalerput
Danmarkimi inuit amerliartuinnartut nalaattarpaat kreditkortimik atornerlunneqarnerat pinerluttut nunanit allaniit kreditkortinik allat aningaasaataannik nuussisarmata. Nunatsinneersut arlallit nunani allani takornariarsimasut ulluni makkunani nalaattarpat kreditkortimik atornerloriarneqartarnerat.
GrønlandsBankenip aamma BankNordikip KNR-imut uppernarsarpaat aningaaserivinniit saaffigineqartarlutik. Saaffiginnittartut ilaat Nets Danmarkimiittoq nunatsinnersut kreditkortiinik atornerlueriartunik paasinnissinnaasartoq. Taakku kreditkortit atorlugit akiliinerit aningaasanillu nuussinerit nakkutigisarpaat.
Ilaatigummi Kangiani pinerluttut kreditkortimik piginnittut nalunaassnnik aningaasanik tigusillutillu nuusseriarsinnaasarput. Taama pisoqartarpoq kreditkortip paasissutissartaanik pinerluttut pissarseriarsinnaasarmata taakkulu tassa atorlugit aningaasanik tigusillutillu nuusseriarsinnaasarput.
Taamali pinerloriartoqarnera Netsimi paasineqarsinnaasarpoq kreditkortimik atuineq pasinartumik allanngoriasaartillugu. Ilaatigummi imatut pisoqarsinnaasarpoq kreditkort Nuummi Brugsenimi atorneqarnerani aqaguinnartoq Thailandimi USA-miluunniit aningaasanik tiguseriarlunilu nuusseriartoqarsinnaasarluni, taamalu pinerlunnikkut tigoriarneqartut aningaasarpassuusinnaasarput ilaqutariit aningaasaqarniarnerannik ajoqusiilluinnarsinnaasut.
Taama pisoqartillugu Netsimiit nunatsinni aningaaseriviit attavigineqartarput aningaasanillu nuusseriarnerit tiguseriarnerillu kingusinnaartigani unitsinneqarsinnaasarlutik.
GrønlandsBankenip aamma BankNordikip maannakkuugallartoq oqaatigisinnaanngilaat qanoq akulikitsigisumik nunatsinneersut tamanna misigisarneraat. Amerlasuutigulli feeriap naammassinerani sapaatit akunneri arlallit qaangiunneranni aningaasanik nuusseriarlunilu tiguseriartoqartarpoq kreditkortimik piginnittoq feeriarfimmiit ungasissorsuarmiileraangat
Aningaaseriviit kreditkortinik piginnittunut kaammattuutigaat akiliinermi kreditkort tunniunnaversaartaqullugu aamma pinkode tunniutinngilluinnaqullugu.
