Kranersuup uppinnera suli misissorneqarpoq
februaarip 14-at 2005 10:38
Kran-ersuup 37 meter-inik portutigisup, Nuummi illoqarfiup qeqqani qanoq ililluni uppissimanera,
Nuummi politiit Sullivinnik Nakkutilliisoqarfiullu suli misissorpaat.
Ippassaq ullup qeqqata kingorna Nuummi anorersuarujussuarpoq. Asiap naatsorsuisimanera naapertorlugu, kran-ersuup uppinnerata nalaani anori sekundtimut 40 meterit tikillugit sakkortussuseqarsimavoq.
Kran-ersuaq Tele-p illorsualiaata sanianiippoq, uppikkamilu Bowling-ertarfiup Oles Varehus-illu akornanut tulluni. Inunnik illunillu ajoqusertoqanngilaq.