Qajannaaqqutit saviminiusut siggeriaannanngorsimanerat Nuummi illuliorfiit ilaanni kranersuup uppinneranut pissutaasimassagunartoq, misissuinerit siulliit takutikkaat, Tele-p illorsualiaani sanasut aqutsisuat Hans Jørgen Kristensen oqarpoq.
Nuummi sapaatiummatanorersuartoq kranersuaq 37 meterisut portutigisoq uppippoq, inunnilli pigisanillu ajoqusiinani.
Hans Jørgen Kristensenip erseqqissaatigaa qajannaaqqutit saviminiusut siggeriaannaasimasinnaanissaannik oqalunneq eqqoriaannaanerusoq.
Ingeniørit sillimasiisarfimmit TopDanmarkimeersut Nuummut aggersarneqarsimapput, ingeniørillu kran-ersuup qajannaaqutai misissussavaat.
Hans Jørgen Kristensenip ilimagaa, sapaatip akunnerata uumap ingerlanerani annertunerusumik paasisaqarumaarlutik.
Kran-ersuup uppinnera sanaartornermut kinguaattoortitsinavianngilaq. Kran-ersuarmi sanaartornermut atatillugu atorneqareerpoq, marsillu aallaqqaataata missaani peertussaasimagaluarluni.
