Anorersuarujussuaq Japanimut aqqusaarmat inuit 23-t toqupput
Sialussuarujussuarnerata kingorna Japanimi aatsaat taama annertutigisumik qarsutsinersuaqarpoq. Inuit 23-t ajunaartut saniatigut inuit 16-it periarfeerunneqarput, Japanimi nutaarsiassaqartitsivik NHK taama allaaserisaqartoq nutaarsiassaqartitsivik Reuters allappoq.
AAMMA ATUARUK Japanimi anorersuarujussuarnera pissutigalugu qimagussuisoqartoq
Anorersuarujussuaq Hagibis arfininngornerup unnukkuani Japanimut annguppoq.
Japanip illoqarfiisa pingaarnersaanni Tokyop eqqaani anorersuarujussuarmat Japanimi silasiuut innuttaasunut mianersoqqusillutik aarlerisaarisimasut nutaarsiassaqartitsivik AFP allappoq.
Innuttaasut inuunertik illersorniarlugu anorersuaq takkuppat toqqorfissarsiarsiussasut kaammattorneqarput.
Sialuk meteringajak
Siallerujussuarneranit qarsutsineq meteringajak angullugu ititigaaq.
Mianersoqqusilluni aarlerisaarut inunnut 6 millioninut apuunneqaqqammertorlu anorersuarsuaq Hagipis tiimimut 216-inik sakkortussuseqarluni Japanimut apuuppoq.
Anori sakkortungaarmat Tokyomi nuna sajuppoq, nunap sajunnera 5,7-tut sakkortutigaluni. Inuit 10.000-t qimarnguimmukaapput amerlanerillu angerlasimaffimminni qatsorsiisimallutik. Takku ilagaat Hidetsugu Nishimura.
- 77-inik ukioqarpunga, taamaattumillu takusimanngisaannarlunga. Anorlerujussuarpalunneranik siallerujussuarneranillu kassorujussuartumik tusaasaqarpugut, qaliarsuit teqqaapput, akunnerup ataatsip missaani illorput sajuppoq, Hidetsugu Nishimura.