Kræftimut katsorsaanermut aningaasartuutit amerleriarujussuarput

Peqqinnissaqarfiup kræftimut akiuiniarneranut aningaasartuutai ukiuni kingullerni amerleriapiloorsimapput. Taamaattoqartuaannartillugulu nunatsinni kræftertunik katsorsaaneq ilorraap tungaanut saatinneqarsinnaanngilaq. Ilami kræftertunik katsorsaanermut aningaasartuutit suli qaffakkiartuaaginnarnissaat naatsorsuutigisariaqarparput, tamannalu Peqqinnissaqarfitsinnut ilungersortitsisussaavoq.
maajip 22-at 2012 13:32

2001-ip 2010-llu akornanni nunatsinni nakorsaatinut tamakkiisunut aningaasartuutit 94 procentinik amerleriarsimapput. Kræftertunulli nakorsaatinut aningaasartuutit 8.200 procentersuarnik amerleriapiloorsimapput, tassa aningaasartuutit 62.000 koruuniniit 5,2 millionit koruuninut amerleriarsimammata, tamanna Naalakkersuisut kræfti pillugu nalunaarusiaanni atuarneqarsinnaavoq.

Kræftertut nunatsinni katsorsarneqartalersimanerinut aningaasartuutit amerleriapiloornerannut pissutaavoq, kræftimilli katsorsaaneq nunatsinni tamakkiisumik ingerlanneqalermat aningaasartuutaasartut 430 procentinik suli amerleriaqqissimapput.

Naallu kræftertut nunatsinni katsorsarneqartartut amerleriarsimagaluaqisut nakorsaatinut aningaasartuutit malinnaasinnaasimanngillat, tassami nakorsaatit nutaat saqqummertuaannarput, asulu akisoqalutik.

- Nakorsaatit nutaat saqqummertartut imaaginnavipput. Tamakkulumi amerlanerit tunisassiarineqarneri kisermaassillutik tunisassiortut ingerlattarmatigit unammilleqatigiittoqarneq ajorpoq. Tassa nakorsaatit akitsoriapiloornerisa nassuiaatissartaat, Ann Birkekær Kjeldsen, Peqqissutsimut naalakkersuisoqarfimmi allaffissornermi pisortaasoq taama nassuiaavoq.

Naak Peqqinnissaqarfik sipaarniuteqarnissaanik piumaffigineqarsimagaluartoq kræftimut nakorsaatinut aningaasartuutit amerleriapiloorneri qanoriliuuseqarfigineqarsinnaanngillat, kræftimullu katsorsaanermi pitsaassutsip allatut ajornartumik ajorseriarnissaa avaqqunneqarsinnaarpasinnani.

- Tamanna ajornartorsiutaavoq, tassami aningaasartuutit qanorluunniit iliuuseqaraluaraanni amerliartuinnavittussaapput. Aningaasartuutimmi taakku unitsiinnarsinnaanngilavut, taamaasioraluaruttami katsorsarneqartut eqqugaasussaapput, taamaammat ilungersoqaagut, Ann Birkekær Kjeldsen oqarpoq.

- Immikkut tapiissutissat aqqutigalugit kræftimut katsorsaanermut aningaasartuutit matussuserneqarsinnaanngippata peqqinnissaqarfimmi sulisut akissarsiaanniit ilanngartuunneqartariaqarsinnaalluarput, taannalu aqqutigalugu pitsanngorsaasoqartariaqalissalluni. Tassa peqqinnissaqarfimmi sulisunut aningaasarsiat isumaqatigiissutiginiutigineqaqqittariaqassapput.
Kisiannili suna tamaat killissaqarpoq, tassami katsorsagassat amerliartorput peqqinnissaqarfimmilu aningaasartuutit amerliartuinnarlutik, Ann Birkekær Kjeldsen taama oqarpoq, kræftimillu akiuiniarnerup politikerinit pingaartinneqarnera nuannaarutiginerarlugu.

Peqqinnissaqarfiulli kræftimut akiuiniarnermut aningaasartuutasa qanorpiaq amerlatiginersut suli iluamik naqissuserneqanngikkaluartoq Naalakkersuisut kræfti pillugu nalunaarusiaanni ima allassimasoqarpoq:

- Katsorsaanermi nakorsaatigineqartartunut aningaasartuutit nunatsinni Danmarkimilu qaffakkiartuinnarput. Aamma katsorsarneqarnissamut neqeroorutigisartakkavut pitsanngorsaaffiginngikkaluarutsigilluunniit kræftertunut nakorsaatit atortakkavut suli qaffakkiartuinnarnissaat naatsorsuutigisariaqassavarput.

Nunatsinni innuttaasut utoqqaliartuinnavipput, taamaattuk kræfternermik nappaatit naliginnaasut saniatigut inooriaatsip nutaaliaasup kingunerisaanik kræfteqalersartut amerliartuinnarnissaat aamma naatsorsuutigineqartariaqassaaq, katsorsarneqarnissamullu neqeroorutaasut suli pitsanngorsarneqarnissaat aamma naatsorsuutigineqartariaqassalluni. Tassa katsorsaanermut aningaasartuutit qaffakkiartuinnavissapput, nakorsaatimmi nutaaliat saqqummersartut akisujuaannartuummata.