Kræftimik toqquteqartut Kalaallit Nunaanni amerlanerupput

Angutit 45-it 54-illu akornanni ukiullit, kræftimik toqquteqartut, Danmarkimi peqatiminnut sanilliullugit, marloriaammik amerlanerupput.

Kræfte akiorniarlugu suliniaqatigiiffimmi Danmarkimiittumi nakorsaaneq, Iben Holt naapertorlugu, nikingassut assut malunnarpoq:

- Kisitsisit assut qaffasipput, ilai marloriaatingajaapput Qallunaat Nunaanni angutit utoqqaanerusut eqqarsaatigalugit, Iben Holt oqarpoq.

Kisitsisit takutippaat kalaallit nunaanni angutit utoqqaanerusut kræfteqarlutik toqusartut 267-iusut, inuit 100.000-tiugaangata. Tulliuvoq Qallunaat Nunaat toqusartut 125-iinnaapput. Nakorsaaneq isumaqarpoq, tamatumunnga peqqutaasinnaasoq , kræfteqartunik paasisaqartarnerit nunatsinni arriippallaarnerat:

- Kisitsisaannaat isigigaanni eqqarsaatigineqarsinnaavoq kræfteqartunik paasisaqarnissaq nunatsinni pikkoriffigineqarpallaanngitsoq. Kisianni aamma imaaratarsinnaavoq, soorlu Danmarkimi assersuutigalugu utaqqisoqartarnera toqumik kinguneqaratarsinnaasoq, Iben Holt oqarpoq.

Kalaallit Nunaanni amerlasuut toqusarnerinut pissutaasartoq nakorsaanerup tassaasorivaa, pujortarneq:

- Katsorsartinniarluni utaqqisarnerit kisimik toqqutigineqarneq ajorput. Kingusinaarluni kræfteqartunik paasisaqarnerit soorunami toqqutigineqartarput. Aamma kræfteqarnernut takussutissanik kingusinaaqaluni paasisaqartarneq ajornartorsiutaavoq. Assersuutigalugu puatsigut kræfteqarneq tupatornermik peqquteqartoq, timimut siaruaatereersimagaangat amerlasuunik toqqutigisarpaat aamma assersuutigalugu aqajaqqup sanilequtaatigut kræfeqalersarneq, Iben Holt oqarpoq.

Kræftemik nappatsaalinermut uku aqqutissaasorai:

- Tupartorneq imigassartornerlu unitsinniarsarikkit. Aamma nakorsiarnissanut paasisitsiniaaneq, kiisalu nappaatip suussusianik paasisaqarnissap pitsaanerunissaa, tamakku tamarmik pitsanngortinneqarsinnaapput.