Kræfti pillugu katersarpassuit

Kræftip akiorniarneqarneranut atatillugu katersinermi aatsaat taamak aningaasanik amerlatigisunik Danmarkimi katersisoqartoq, kræftip akiorniarneqarnerani suliniaqatigiit nalunaarutigaat.

Kræftimut akiuiniarnermi ukioq manna katersorneqarsimapput aningaasat 26,5 mio. koruunit, siornamullu sanilliukkaanni amerlanerussuteqalaarput, tassami siorna katersorneqarsimapput aningaasat 26,2 mio. koruunit.

Kræftip akiorniarneqarnerani suliniaqatigiit siulittaasuata nakorsaanerup Anne Thomassenip katersinerup inernera assut qujamasuutigaa. Erseqqissaatigaalu katersiniarnermi inuusuttorpassuit peqataasimanerat.

Anne Thomassen aamma oqarpoq, katersat ilaat ukioq manna nunatsinnut immikkoortinneqassanngitsut, ukiut siuliini nunatsinnut immikkoortitsisoqareersimammat, taakkulu aningaasat Nuummi Dronning Ingrid-p napparsimaviata kræftertunut immikkoortortaqarfianut aningaasaliissutigineqarsimapput.

Taassuma aamma oqaatigaa, nunatsinni kræftip akiorniarneqarneranut peqatigiiffik, tassalu Neriuffik Danmarkimi Kræftip akiorniarneqarneranut suliniaqatigiinnut atajunnaarsimasoq, erseqqissaatigaali suli suleqatigiilluaramik. Suleqatigiinnerlu taanna ilinniartitaanikkut aammalu piumassutsiminnik ikiuuttoqarusutsillugu suleqatigiinnerusoq erseqqissaatigaa.