Koytomi isumaqatigiissut malinneqartariaqartoq
Nukissiutit pillugit nalunaarusiap qanoq ingerlateriaqqinnissaata pineqarnissaanut Naalakkersuisut utaqqisaaginnalerput. Kyoto-mi isumaqatigiissutip piviusunngortinnissaanut 1 mio. kr.-nit atorfissaqartinneqarmata.
Aningaasaqarnermut ataatsimiititaliap siulittaasorisimasaata Ole Thorleifsen-ip Naatsorsueqqissaartarfiup aappaagumut nukissiuteqarneq pillugu nalunaarusiassaanut aningaasartuutissanik immikkoortitsisoqarsimannginnera ajuusaarutigaa. Aningaasaliinngitsoorsimaneq naalakkersuisooqatigiit sapaatip akunnera kingulleq aappaagumut aningaasanik inatsisissap allanngortiternerani peersimagaat, Ole Thorleifsen radioavisimut oqarpoq.
-Naalakkersuisut qisuariarnissaat utaqqiinnartariaqarpoq, ataatsimiititalialluunniit siulittaasortaavata Simon Olsen-ip aappaagumut utaqqittariaqassagaa, Ole Thorleifsen oqarpoq.
Naatsorsueqqissaartarfiup pisortaa Lars Pedersen pakatsisimanerarpoq.
-Uggornarpoq nalunaarusiassap aningaasaliivigineqannginnera, tamanna naalakkersuinikkut nalilersuinerup kinguneraa.
Nalunaarusiap suliarinerata ingerlaannarnissaa Naalakkersuisut aalajangigassarilerpaat, Lars Pedersen radioavisimut oqarpoq.
Aningaasaqarnermut ataatsimiititaliap siulittaasortaavata Simon Olsen-ip ajornartorsiut saqqummersoq arajutsimannginnerarpaa.
Nukissiuteqarneq, avatangiisillu pillugit nalunaarusiap ingerlaannarnissaanut Inuutissarsiornermut Avatangiisinullu Qullersaqarfinnit 1,1 mio. koruunit arlaanniit nassaariniartariaqalerpaat, 2007-inngortinnagu nalunaarusiap Naalagaaffiit Peqatigiiffiannut saqqummiutinnginnerani. Avatangiisinut naalakkersuisoq Jens Napaattooq oqaaseqartissinnaasimanngilarput.
Nalunaarusiaq inaarlugu suliarineqanngippat, Nunarsuarput tamakkerlugu sunniuteqartumik, Kyoto-mi Nunatta isumaqataalluni atsioqataasimanera, ajornartorsiutaalissaaq.
