Kosovop namminersulernissaa isumaqataaffigaat

Kosovop namminersulivinnissaanut EU-mi ilaasortat tamangajammik isumaqataalerput. Serbiali Ruslandilu Kosovop namminersulivinnissaanut isumaqataanngimmata, qanoq ililluni Balkanimi peqqarniitsuliornerit sorsunnerlu uteqqiffiginagit Kosovop namminersulivissinnaanera piviusunngortinneqarsinnaanersoq nalunarallarpoq.

Kosovop illuatungaannarsiorluni namminersulersinnaanera ilimanarsilinnguatsiarpoq, tassa Kosovo imminut namminersulivinnerarpat taava akuerserusuttunut ilaapput USA, nunallu killiit amerlanerit, taakkualu saniatigut nunat islamisiortut Kosovomi albaniamiunik islamisiortunik illersuisut akuersaarnissaat ilimagineqarluinnarpoq. Kosovomi albaniamiut nalunngilaat aningaasaqarniarnermikkut isumannaallisaanikkullu nunat killiit pisariaqartilluinnarlugit. Taamaammat Kosovomiut qaqugu namminersulivillutik imminnut suaarutiginissartik isumaqatiginiutigerusuppaat. Kosovomi albaniamiut siuttuisa ilaat nunat killiit naalakkersuisuinut saaffiginnipput qanoq namminersulivikkiartuaarnissartik pillugu isumaqatigiinniarusullutik. Nunat killiit Serbiami januaarimi februaarimiluunniit qinersinissap naammassineqaqqaarnissaa kissaatigaat, taamaammat Kosovop namminersulivinnissaa februaarimi pisinnaassasoq ilimanarpoq. Serbiami suli qinersisoqanngitsoq Kosovo namminersulivikkaluarpat, tamanna Serbiamiunit ingasaassinianit pissaanermik tigusiniarlutik atorneqarsinnaanera, arlaatalu præsidentitut qinigaasinnaanissaa nunanit killernit aarleqqutigineqarpoq. Ajornartorsiulli taannaannaanngilaq, Balkanimimi, allanilumi nunat immikkoortortaasa namminersulivinnialernissaat, Ruslandimiit aarleqqutigineqarpoq.

Nunat allat immikkoortortaasa namminersulivinnialersinnaanerat soorlu Spaniamit aarleqqutigineqarpoq, tassami Spaniami inuiaat ikinnerussuteqartut, Baskerit namminersulivinnialersinnaammata.