Kosovomut unammineq tv-mi Facebookimiluunniit takuteqqusaanngitsoq

Kalaallit arsaannermi nunanut allanut unammisartut Tyrkiamiipput unammisarnerannili anginerpaaq assit aalasut atorlugit takuteqqusaanngilaq

Kalaallit arsaannermi nunanut allanut unammisartut tallimanngorpat unnukkut Kosovomut unammissapput.

Nunat tamalaat allattorsimaffianni Kosovo nunarsuarmi kakkannerpaat 106-attut inissisimasuummat kalaallit maannamut unammisarsimasaanni sakkortunersaavoq.

AAMMA ATUARUK Morten Rutkjær: Nunanut allanut unammisartut aatsaat taama unammersuaartigilerput

Misigisisassarli taanna annertooq arsartut iluminni pigiinnartussanngorpaat.

Europami arsaattartut kattuffiat UEFA sioorasaarisimavoq nunat tamalaat kattuffianni ilaasortaanngitsumut unammineq tv-kkut takutinneqassappat Kosovomut kinguneqartitsisoqassasoq.

- Kosovomiit piumasarineqartut allatut ajornartumik akueriinnartariaqarsimavagut, kalaallit arsaattartut kattuffianni KAK-mi siulittaasoq Benjamin Kielsen KNR-mut oqarpoq.

- Aamma Facebookimi streamerinissaq piumasimagaluarparput. Aamma taamaasiornissaq itigartinneqarpoq, Benjamin Kielsenip oqaatsini ilavai.

Neriuutissaqarpoq

Ukiuni qulikkaani arlalinni Kalaallit Nunaat nunat tamalaat kattuffissuinut ilaasortanngorniarpoq – maannamulli suli iluatsinneqanngilaq. Maanna amerikap avannaani kattuffissuaq Concacaf ilaasortanngorniarfigineqarpoq.

- Qaqugu ilaasortanngortoqarsinnaanersoq oqaatigisinnaanngilara. Suleqatigiissitaq tassannga suliaqarpoq taakkulu suliaannut nukingisaarinianngilanga, Benjamin Kielsen oqarpoq.

Taassumali innersuupai Nuummi sanaartukkat annertuut marluk nunani tamalaani kattuffimmi ilaasortanngornissamut iluaqutaasinnaasut.

- Nunatta unammersuartarfissaa qulisaq Inatsisartut oqaluuserisussaavaat. Tamanna pinngitsoorani maluginiarneqartussaavoq, Benjamin Kielsen oqarpoq.

- Piumasaqaatit aamma ilagaat mittarfissuarmut nunanit allaniit toqqaannartumik tikiffigineqarsinnaasumut ungasissuseq. Nuummi ukiut marluk qaangiuppata mittarfissuartaartoqartussaammat nunani tamalaani kattuffissuarmut ilaasortanngorniarnerput iluaqusersinnaavaa, Benjamin Kielsen oqarpoq.

Tamakkuli utaqqineqarneranni kalaallit arsaannermi nunanut allanut unammisartut nunanit tamalaaneersunut unammisarnissaat toqqaannartumik tv-mi internettikkulluunniit takutinneqarsinnaassanngillat.

KNR-TV Tyrkiamiit toqqaannartumik aallakaatitsinissamut tv-liortartunut isumaqatigiissuteqareeraluarpoq Kosovomut unamminerup takutinneqarnissaa siunertaralugu. Periarfissarli tamanna nunat tamalaat kattuffiini ilaasortaanermut piumasaqaatinit asserneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl