Kosovo Serbiamit avissaarnialerpoq
Kosovop Serbiamit avissaarnissaa aqagu suaarutigineqarumaartoq Danmarks Radiop tusagassiortuata Thomas Hjortsøep oqaatigaa. Kosovop namminersulivinnissaa Serbiamit, Ruslandimit Serbiamiullu Kosovomi najugaqartut isumaqatiginngilaat.
Allattoq Mads Lynge
Kosovomi illoqarfiit pingaarnersaanni Pristinami kikkut tamarmik erfalasulersimapput. Biilit erfalasulerlutik angalaarput, ballonit sumi tamaani takussaapput, inuillu nuannattut imaaginnavillutik.
Naak Kosovop namminersulivinnissaanut pilersaarutit ullumi aatsaat saqqummiunneqaraluartut inuit nuannannissaminnut qangalili piareersareernikuusut tusarliunneqarpoq.