USA-mi naalagaaffimmi Virginiami ilinniarfissuarmi inuppassuarnik ippassaani inuartarinninnerup inuiannit koreamiunit akiniaavigineqarnissaa Korea Kujallermi oqartussaasut ernummatigaat.
Ilinniarnertuunngorniap Korea Kujallermiup, Cho Seung-Hui-p, inuit 32-t inuartarai, naggataagullu imminut toqulluni.
Korea Kujallermi nunanut allanut ministereqarfiup toqutaasut ilaqutaat telegramminik misiginneqatiginnissutinik nassereerpai.
Ministereqarfiup aamma erseqqissaatigaa koreamiut USA-mi najugallit pitsaaliorneqarnissaat piarersimaffigineqartoq.
Perulluliortoqannginnissaanut qanoq piareersimasoqarnersoq Korea Kujallermi oqartussaasut oqaatigerusunngikkaat, Franskrigimi nutaarsiassaqartitsiviup, AFP-p, allaaseraa.
Cho Seung-Hui USA-mut 1992-imi nuuppoq, Washingtonillu avatinnguani peroriartorluni. Angajoqqaavi errorsisarfiuteqartuupput.
Tusagassaqartitsiviit arlallit naapertorlugit Cho Seung-Hui aallaasersornissami tungaanut eqqumiitsumik pissusilersortarsimavoq, soorlu:
Kollegiami inigisamini ikumatitaliortarsimavoq, arnanillu assigiinngitsunik malersuisarluni. Tuluttut allaaserisamini naalaaserlunnartunik allattarsimavoq, tamannalu pillugu atuarfimmi siunnersuisartunut innersuunneqartarsimalluni.