Korea avannarliup atomimik nukiussiornini unitsikiartorusuppaa

februaarip 13-at 2007 16:12

Korea Avannarliup atomimik nukissiornini atorunnaarsikkiartussallugu isumaqatigiissuteqarsimavoq aamma atomimik nukissiorfik atomimik sakkussiornermut atorneqarsinnaasoq ullut 60-it qaangiutsinnagit matuniarpaat tamatumunngalu taarsiullugu uuliamik nerisassanillu ikiorserneqassapput.

Kinap, Japanip, Ruslandip, Korea Kujalliup, USA-p, Korea Avannarliullu ukiut pingasut sinnerlugit isumaqatigiinniarnerat isumaqatigiinnermik kinguneqarpoq. Isumaqatigiinniarnerup naajartornerani USA-p Korea Avannarliullu isumaqatigiinniarnerat iluatsissimavoq. Amerikamiut Koreap Avannarliup sakkussakillisarneqarnissaanut alloriartoqarnerarlugu oqaatigaat.

USA-p FN-imi aallartitarisimasaata John Boltonip isumaqatigiissut Buship naalakkersuisuinut kinguariarnertut taavaa.

John Bolton aamma oqarpoq isumaqatigiissut Clintonip 1994-imi Korea Avannarlermut isumaqatigiissutaanit pitsaanerunngitsoq, tassami isumaqatigiissut Buship atorsinnaanngitsutut isigimmagu. Taamaattorli oqartoqartoqarpoq Buship isumaqatigiissut Clintonimit isumaqatigiissutaanera piinnarlugu atorsinnaanngitsutut isigisimagaa.

Allat nersualaarinninnerupput. Condoleezza Rice nalunaarpoq aqqutissiuisumik isumaqatigiissuteqartoqarsimanerarlugu, ajunngitsup tungaanut alloriartoqarnerarpaa Kinamiullu isumaqatigiissummut aqqutissiuisimanerat nersualaarpaa. Isumaqatigiissut pillugu Bush ullumikkut kingusinnerusukkut oqaaseqassasoq naatsorsuutigineqarpoq.

Isumaqatigiissutip imaa ilisimaqqissaanngikkaluarlugu oqaatigisinnaavarput malinneqassappat Korea Avannarlermiut atomimik nukissiornertik unitsissavaat, atortorissaarutitik uranimut tunngasut matussavaat, avataaniit nakkutilliiartortut akuersaassavaat aamma atomimik nukissiornerminni allattugaatitik saqqummiutissavaat. Tamakkununnga taarsiullugu, ukiumut 1 mio. tonsimik uuliamik tunineqartassapput. Aamma avammut niuernerminni killilersuiffigineqarunnaassapput. Tassa Korea Avannarlermiut nunarsuarmioqataasutut isigineqaqqilissapput, tamatumunngalu taarsiullugu Amerikamiut kissaatigisartik pissavaat, tassalu Korea Avannarlermiut atomimik nukissiornerat unitsinneqassaaq.