Korea Avannarlermi peqqinnissaqarfik atuinikinnersaavoq
Inuit pisinnaatitaaffiinik suliniaqatigiiffik Amnesty International nittartakkamini allappoq, Korea Avannarlermi innuttaasoq ataaseq dollarip ataatsip nalinga inorlugu peqqinnissakkut ikiorneqartartoq.
Korea Avannarlermi innutaasut Kalaallit Nunaanni innuttaasut assigalugit akeqanngitsummik napparsimaveqarfinnit ikiorneqarsinnaasariaqarput, inuit pisinnaatitaaffiinik suliniaqatigiiffik Amnesty International isumaqarpoq. Korea Avannarlermi innutaasut ilaat nakorsamit ikiorneqarniarlutik tupanik, imigassanik aalakoornartortalinnik, nerisassannillu akiliillutik katsorneqartarsimapput, Amnesty International innuttaasut ilaannit taama oqaluttuuneqarsimavoq.
Napparsimaviit ilaanni avatit peerneqartarsimapput passunneqartut ilisimajunnaartinnagit, napparsimaviit amerlasuut nakorsaatinik nunguutsisimapput, nerisakkilliortarnerillu pissutigalugit nappatit tuniluullutik.
Innuttaasut nakorsanit misissortinniaraangamik ajoquteqarnerminnillu misilittsinniaraangamik, nakorsamut akiliinissaminnik piumaffigineqartarsimapput.
Korea Avannarlermi innuttaasut ikiorneqarnissaanik inuit pisinnaatitaaffiinik suliniaqatigiiffiup Amnesty Internationalip nunarsuarmi innuttaasunut kajumissaaruteqarpoq, naalakkersuinikkut sammiviit eqqarsaatiginagit, Korea Avannarlermi innutaasut ikioqqulugit.
Januarip februaarillu qaammataani qaqorteqqasut akii marloriaammik akitsormata, inuit tusintinik amerlassusillit perlerlutik toqupput.
Inuit pisinnaatitaaffiinik suliniaqatigiiffiup Amnesty Internationalip Korea Avannarlermi attavigisimasai oqaluttuarput, orpiup qalipai, ivikkat sorlaallu nerillugit annassimallutik.
