Korea Avannarleq Naalagaaffiit Peqatigiit oqaloqatigiissutigaat

Naalagaaffiit Peqatigiit isumannaallisaaniaqatigiivi immikkut ittumik matoqqasumik ataatsimiinneranni Korea Avannarliup raketinik misileraalluni qaartartumeerisarnerata unitsinneqarnissaa japanimiunit, amerikamiunit tulunnillu siunnersuutigineqarpoq.

Kinamiut Korea Avannarliup eqqaamiuisa tamanna ernummatigalugu nalunaaruteqarnerminni ilanngullugu Naalagaaffiit Peqatigiit tamat iluarisinnaasaannik aaqqiissuteqarnissamik siunnersuuteqaqqullugit kajumissaaripput.

DR-ip aallartitaa Thomas Falbe Washingtonimiit ima nalunaaruteqarpoq:

- USA-mit pisoq malinnaaffigineqaqqissaarneqarpoq sakkutuullu Korea Avannarliup eqqaaniittut sillimatinneqarput. Præsidentillu illorsuanit killilimmik paasissutissiisarsoqartarpoq. USA-p siornatigut Korea Avannarlermi misileraalluni qaartitsisarnerit unitsinneqarnissaat kajumissaarutigereerpai Koreamiullu navianartorsiortitsisinnaanerat USA-mit ilimagineqanngilaq. USA-p Korea Avannarlermut isummersimanini allanngortikkallarusunngikkaa malunnarpoq. Massakkut Korea Avannarliup eqqaani sakkutuut sillimatinneqarneri eqqaassanngikkaanni USA-p tungaaniit annerusumik iliuuseqartoqarusunngitsoq aamma malunnarpoq. USA massakkorpiaq nunamik atomimik sakkuutilimmik akeraqassalluni nukissaqanngippasippoq taamaattumik nunat tamat ikiorsiullugit aaqqiinissaq USA-mit kissaatigineqarmat Naalagaaffiit Peqatigiinni suliaq eqqartorneqarpoq. Eqqartuinermilu Korea Avannarliup eqqaamiuisa Kinamiut akuliutsinneqarnerata kingunerisaanik massakkorpiaq susoqarnavianngitsoq ilimagivara, Thomas Falbe oqaluttuarpoq.