Korea Avannarleq ernumatitsivoq

Korea Avannarleq raketsimik ungasissumut igeriuttakkamik misileraassagaluaruni tamanna ”oqqassaarinertut pissusilersornerussaaq”.

Taama Amerikami illersornissamut ministereqarfimmiit sioorasaarerpasissumik oqartoqarpoq.

USA-p Naalagaaffiit Peqatigiinnut aallartitaata, John Boltonip, ilutigalugu sioorasaarutigaa, Naalagaaffiit Peqatigiit isumannaallisaanermut Siunnersuisoqatigiivi Koreamut Avannarlermut iliuuseqarniartut.

Taama mianersoqqusinerit pilerput, Korea Avannarleq raketsimik ungasissumut igeriunneqarsinnaasumik misilittaaleruttormat, raketsip taassuma Japan qulaattussaavaa.

Korea Avannarleq taama pissagaluarpat, Japanimi ministeriuneq oqareerpoq, Japan sakkortuumik akiumaartoq.

USA-mi naalakkersuisunit tusarfiit Korea Kujallermilu naalagaaffimmi atorfillit nalunaarutigaat, Korea Avannarlermi sakkutuut raketsi orsersoreersimagaat, raketsi taanna atomimik qaartartoqarsinnaasoq, 4300 kilometerit ingerlaarsinnaavoq, taamaalilluni USA-mi Alaskamut anngussinnaalluni.