Korea Avannarleq atombombemik qaartitsisoq
Atomimik misileraalluni qaartitsinerit nunarsuarmioqatigiinnit assuarineqaqisoq unnuaq Koreami avannarlermi ingerlanneqarsimavoq, radiollu qinngornerinik uloriarnartunik aniasoqarnavianngitsoq Koreami avannarlermi nutaarsiassaqartitsivik KCNA ilisimatitsivoq.
Koreami kujallermi atorfillit oqarput, koreap avannaata kitaata sineriaani unnuaq nunatta nalunaaqutaa malillugu unnuap qeqqangajalernerata missaani qaartitsinerit pisimasut.
Qaartitsineq pivoq FN-ip sillimaniarnikkut siunnersuisoqatigiivisa ullut pingasut matuma siorna Koreami avannarlermi misileraalluni qaartitsisarnernik unitsitseqqullusilluni kaammattuuteqarnerata kingorna.
Amerikami pisortat ilsimatitsipput qaartitsinissap pinissaanut minutsinik 20-nik sioqqutsumik Kina ilisimatinneqarsimasoq, naalakkersuisullu ingerlaannaq Japan, Korea kujalleq USA-lu ilisimatissimagaat. Piffissami sivitsortumi Korea avannarleq USA-p saassusseratarsinnaanissaata pinngitsoortinnissaa siunertaralugu sioorasaaruteqartarsimavoq.
