Koora Taunajik: - Sumiorpaluutit atorlugit oqalunnera pissutigalugu iliinnarnikuuara

Koora Taunajik Sermiligaarmiu 14-inik ukioqarluni sumiorpaluutini atorlugit Tusaanngamut saaffiginnippoq.

- Taamani aliasullunga Tusaanngamut saaffiginnikkama, oqaloqatigiinnitsinni paatsoorneqartutut misigivunga soorlu kukkusumik siunnersorneqarlunga, Koora Taunajik maanna 19-inik ukiulik oqarpoq.

Naak Tusaanngamut kikkulluunniit saaffiginnissinnaagaluartut Koora Taunajiup sumiorpaluutini atorlugit oqaloqateqarniaraluarnini iluaqutigisutut misiginnginnamiuk oqaloqatigiinneq unitsiinnarpaa:

- Sumiorpaluutit atorlugit oqalunnera pissutigalugu iliinnarnikuuara oqaloqatigiinnerput maanngaannaq kipiinnarnikuuvoq, taanna oqarpoq nangillunilu:

- Tassani eqqarsarpunga sooruna tunumiumik Tusaanngami sulisoqanngitsoq? Kitaamiuinnaat sulisut, eqqarsaatit qaffakaasut aatsaat iluamik aliasunnerulerpunga misigissutsikkullu aalassaqqalaarlunga, Koora Taunajik oqarpoq.

Koora Taunajillu paasineqanngitsutut misiginermini aliasuutini pillugit oqaloqatiginninnissani soqutigiunnaarpaa.

Siunissami tulluarsaasoqarnissaa neriuutigaa

Koora Taunajiup oqaloqatiginninnissani ornigiunnaarsimagaluarlugu kammalaatini oqaloqatigisalerpai. Maanna Tusaanngamut sianeqqittarpoq attaveqaatinilu suli atorluartarlugit.

- Kingullermik oqaloqateqarninni kitaamiutut oqalukkama, aatsaat iluamik paasineqartutut ajunngitsumillu siunnersorneqartutut misigaanga, taannalu iluaqutaavoq, taanna oqarpoq.

Taassumali tunumiutut, avanersuarmiutut kujataarmiutullu sumiorpaluutilinnik aamma Tusaanngami sulisoqalernissaa maanna neriuutigaa.

- Soorlu saaffiginnittoq suminngaanneeraluarunilluunniit sumiorpaluutini atorlugit oqaloqateqartalersinnaanissaa siunnersuutigerusuppara, inuit ajunnginnissaat kissaatigalugu, Koora Taunajik oqarpoq.