Konservativit Nunatsinni meeqqanut ikiuiniarlutik ilungersorput
Kalaallit nunaanni naalakkersuisut Danmarkip ikiuniarluni neqerooruteqarneranik itigartitsinerisa kingunerisaanik Kalaallit Nunaanni meeqqat kaallutik innartarnerat Konservativinit akueriuminaatsinneqarpoq, Konservativit kalaallit Nunaat pillugu oqaaseqartittagaat Per Ørum Jørgensen oqarpoq.
Danskit naalagaaffianni innutaasoq kinaluunniit taamatut atugaqartussaanngilaq, aammalu danskit kalaallillu nunaata akornanni isumaqatigiissuteqartoqarsimagaluarpalluunniit Per Ørum Jørgensen oqarpoq. Nunat tamat akornanni isumaqatigiissutit malillugit nuna sumiikkaluartorluunniit avataanit ikiorneqarnissaminik pisariaqartitsisoq ajornartorsiummilu nammineq qaangiisinnaanngitsoq ikiorneqarnissaminut pisussaatitaavoq, Per Ørum Jørgensen aviisimit Jyllandsposten-imit taamatut issuarneqarpoq.
Danmarkip kalaallit nunaannut ikiuniarluni neqeroorutaa kalaallinit tigujumaneqanngippata danmarkip kalaallit nunaannut ataatsimoortumik tapiissutaasa iluanni 35 millioner koruunit meeqqat atuarfinni nerisaqartinneqarnissaannut atorneqartussatut immikkoortinniarlugit Per Ørum Jørgensen siunnersuuteqarpoq.
Ministeriuneq Anders Fogh Rasmussen nunat tamat isumaqatigiissut pillugu akulerunniarnani oqarpoq, erseqqissarlugu isumaginninnermut oqartussaaffik kalaallit politikeriinit isumagineqarmat. Namminersorneq pillugu inatsit aqagu folketingimi oqaluuserineqalerpat kalaallit nunaanni meeqqat atugaasa oqallisigineqarnissaa qularutigineqanngilaq.
