Konservativit Demokraatinut tikeraalerput

juulip 24-at 2007 05:52

Demokraatit suli sammilaaginnarallartigik, partiimi taanna Danmarkimi Det Konservative Folkepartiimit qaammatip uuma naalernerani tikeraartoqassaaq.

Konservativit siulittaasuat, aningaasaqarnermut inuussutissarsiutinullu ministeri, Bendt Bendtsen, aamma avatangiisinut ministeri, Connie Hedegaard, tassaapput tikeraartussat. Sermitsiaq nittartakkamini taama allappoq.

Demokraatit siulittaasuat, Per Berthelsen, partiillu Inatsisartunut ilaasortaatitaasa sinneri, ministerit taakku marluk ataatsimeeqatigissavaat, Demokraatillu siulersuisuuneri Nuummilu kommunalbestyrelsimi ilaasortaatitai aamma ilassissallugit.

- Demokraatit Konservativillu ukiuni kingullerni oqaloqatigiilluartarnerat tikeraarnermut pissutaalluinnarpoq. Demokraatit tassaapput Kalaallit Nunaanni partii talerpilliulluartut, taamaammat politikkimut tunngassuteqartunik Danmarkimi Konservativinik oqaloqatiginnittarnerput ingerlateqqikkusoqaarput, tamannami partiit marluulluta pimooruttuuvarput, Per Berthelsen Sermitsiamut oqarpoq.

Silap pissusia pillugu Naalagaaffiit Peqatigiit Københavnimi 2009-mi ataatsimeersuartitsinissaanut Kalaallit Nunaata qanoq inissisimanissaa tikeraartoqarnermi aamma eqqartorneqartussanut ilaassasoq Demokraatit siulittaasuata naatsorsuutigaa.