Søren Pape Poulsen (K) ministeriunerup atuuffimmi najugarisaata Marienborgip saaniittoq.Assi: Ida Marie Odgaard/Ritzau Scanpix

Konservatiivit naalakkersuisoqatigiiliornissamut isumaqatigiinniaqataajunnaartut

Danmarkimi Konservative Folkeparti naalakkersuisoqatigiiliornissamut isumaqatigiinniaqataajunnaarpoq. Venstrekkut suli isumaqatigiinniaqataapput.

Naalakkersuisoqatigiiliornissamut isumaqatigiinniaqataajunnaarlutik, Danmarkimi Konservative Folkepartip siulittaasua Søren Pape Poulsen Facebookimi ippassaani arfininngornermi nalunaarpoq.

Taanna kunngip naalakkersuisussarsioqqusaalu, tassa Mette Frederiksenilu (S), sapaatit akunnerini kingullerni oqaloqatigiilluarsimanerminnut qujavoq, nammineerlunili partiiatalumi Mette Frederiksen ministeriuneralugu naalakkersunngoqataanissartik takorloorsinnaanngikkitsik aamma oqarpoq.

- Qineqqusaarnermi neriorsuutivut eqqaassagaanni taamaalioraluarutta naleqqunnavianngilaq, tamanna aamma oqaatigereerpara. Tutsuiginassuseqarnissarmi politikkimi aamma pingaaruteqarluinnarpoq, Pape Poulsen Facebookimi allappoq.

Konservatiivilli socialdemokratit siuttoralugit naalakkersuisoqatigiinngortussanut illuatungiliuttutut suleqataarusupput. 

Parteertik naalakkersuisoqatigiiliornissamut sapaatit akunneranit sivisunerusumik isumaqatigiinniaqataasimanngitsoq, Liberal Alliancekkut siulittaasuat Alex Vanopslagh Facebookimi ippassaq sapaammi aamma allappoq. Parteertillu naalakkersuisoqataalernavianngitsoq, taanna ilanngullugu allappoq.

- Mette Frederiksenip siuttuuffigisaanik naalakkersuisoqataalerumanata aamma nalunaarutigisareerparput, taanna allappoq.

Venstrekkut suli isumaqatigiinniaqataasut

Venstrekkut, Moderatit, Radikale Venstrekkut SF, Dansk Folkeparti qinikkallu nunat avannarlerneersut naalakkersuisoqatigiiliornissamut suli isumaqatigiinniaqataasuupput.

Venstrekkut siulittaasuat, Jakob Ellemann-Jensen, naalakkersuisoqatigiiliornissamut isumaqatigiinniarnerit pillugit Twitterimi ippassaq sapaammi ima allappoq:

- Parteerput, Venstre, illuatungiliuttutut naalakkersuisoqataasutulluunniit Socialdemokratillu pituttortumik suleqatigiilissagutta apeqqutaatinnagu, politikkikkut anguniakkatta nalinginnaasut saniatigut aamma suleqatigiinnertaqartariaqassaaq.

Lars Løkke Rasmussenip siulittaasuuffigisai, Moderatit, naalakkersuisoqataalernissartik pingaarnerpaanani sunniuteqarsinnaagunilli naammagigitsik oqaatigaat.

- Amerlanerussutillit isumaannik tunngavilimmik partiinik siammasissumik suleqatigiikkusuttunik naalakkersuisoqatigiiliortoqarneratigut taamaaliorsinnaavugut, taanna oqarpoq.

Partiit sisamat nunatsinneersut Savalimmiuneersullu naalakkersuisoqatigiiliornissamut isumaqatigiinniaqataasunut suli ilaagaluarlutik sapaatit akunneranit sivisunerusumik aamma isumaqatigiinniaqataasimanngillat.

Enhedslistenikkut, Danmarksdemokratit, Ny Borgerligekkut aamma Alternativekkut aamma isumaqatigiinniaqataajunnaareernikuupput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl