Kommuunit kinguarsaapput
Kommuunilu paasissutissanik piniarfigiuminaanneqarnerpaaq tassaavoq Qaasuitsup Kommunia. Tassanngaanniimmi suliassat 69-it Isumaginninnermi Naammagittaalliuteqartarfiup naliliiffiginiarlugit uninngatippai.
- Uninngasuuteqangaatsiarpugut. Tassa uani ajornartorsiutigaatsiaratsigu kommunininngaanniit paasissutissanik piumagaangatta kommuunit nassiunneq ajoramikkit. Nukingisaarutinik nassiussigaluarluta tusarneq ajoratsigit suliassarpassuit massakkut uninngagallarput, Naja Joelsen, Isumaginninnermi Naammagittaaliuteqarfiup siulittaasua, taama oqarpoq.
Kommuunilu paasissutissanik piniarfigiuminaanneqarnerpaaq tassaavoq Qaasuitsup Kommunia. Tassanngaanniimmi suliassat 69-it Isumaginninnermi Naammagittaalliuteqartarfiup naliliiffiginiarlugit uninngatippai. Suliassat, naammagittaalliuteqartarfiup suliareqqinniarlugit kommuunimut qangalili paasissutissanik annertunerusunik qinnuteqarfigisimasaralui:
- Uani ingammik Qaasuitsup Kommunianit uninngasuuteqangaatsiartorujussuuvugut utaqqisunik. Tassa allaffigigaluarlugit, nukingisaarigaluarluta, paasissutissanilli pissanata, Naja Joelsen oqarpoq.
Kisianni naammagittaalliutigineqartut tamarmik kommuunit paamaarussinerannik utaqqisinneqarneq ajorput.
Naammagittaalliuteqartarfimmi ukiup affaani siullermi Nunatsinnit tamarmit 300-it pallillugit naammagittaalliutinik tigusaqareersimalerpoq.
Naammagittaalliuteqartarfillu suliassat amerlanerpaartaanni aalajangeersimavoq, aamma suliassani paasissutissanik annertunerusumik piffiusimanngikkaluartuni:
- Taamaattoq kingullertigut oqaluuserigaatsiarnikuuarput utaqqisarneq taanna qimakkusullugu inuiaqatigiit maalaarsimasut utaqqivallaannginniassammata. Tassa paasissutissat pigeriikkavut atorlugit aalajangiiniarluta. Taamatut aalajangiisalissagutta imaassinnaavoq tamanna kommuuninut ajoqutaasoq. Kisianni utaqqiinnarsinnaanngilagut ukiut arlallit paasissutissat taakkua utaqqillugit, Naja Joelsen oqarpoq. Taassuma innuttaasut naammagittaalliuteqartarfimmut anngussisalernerulernerat nuannaarutigaa:
- Imaassinnaavoq pissutsit allanngorsimaneranni suliassat amerlisut, inuit pisinnaatitaaffitik atorluarnerulersimassuk. Imaanngilaq amerlisut kommunimi sulisut sulinerat immaqa ajornerummat, Naja Joelsen oqarpoq.
