Kommuunit aggorneqaqqissanngikkallarput

Kommuunit allanngorteqqinnissaat pillugu Naalakkersuisut suliniuteqalersaanngillat.
Allattoq Noah Mølgaard
januaarip 31-at 2012 07:22

Kommuunerujussuit nutaamik aggorlugit imaluunniit kommuunitoqqat atuleqqinnissaannik kissaatit Naalakkersuisut maannakkut malinnialersaanngilaat. Naalakkersuisut taama akissuteqarput kommuunit nutaamik aaqqissuunneqarnissaat arlalinnit piumasarineqareersoq.

- Kommuunerujussuit atulernerisa kingorna qinigaaffik siulleq suli naanngilaq. Taamaammat eqqissilaarallarta, Naalakkersuisut siulittaasuat Kuupik Kleist KNR-imut taama oqarpoq.

Aappaagu apriilimi kommuuninut qinersisoqartussaavoq kommuunillu nutaamik aggorneqarnissaat pillugu erseqqissaumik kommuuniniit suli siunnersuuteqartoqanngilaq.

- Tullianik kommuunimut qinersinissaq sioqqullugu kommuunit nutaamik aggornissaat piviusorsiortuunngilaq. Piffissaq taama sivikitsigisoq atorlugu allannguut taama annertutigisoq eqqunneqarsinnaanngilaq. Aamma suli erseqqissumi kommuuniniit siunnersuummik tigusaqanngilagut. Allannguisoqassappat suliaq kommuunit namminneerlutik aallartittariaqarpaat, Kuupik Kleist oqarpoq.

Qaasuitsup Kommuunia angivallaarnerarlugu allannguerusuttoqarpoq aammalu Kommuuni Kujallermi innuttaasut oqartussaaqataanerat nukittorsarusunneqarluni. Kommuunini taakkunani marlunni allannguinissamik siunertaqartumik suliniaqatigiiffiliortoqarpoq. Qaasuitsup Kommuuniani kommunalbestyrelsep tamanna oqaluuserereerpaa tamatumalu kingorna suleqatigiissitamik pilersitsisoqarluni.

Qaasuitsup Kommuuniani suleqatigiit innuttaasunik, suliniaqatigiiffinnik partiinillu tamaneersuni ilaasortalik suliaminik ukiormanna juunimi saqqummiussissaaq.