Kommunit uulialersaarutilerput
Oqaluuserineqartussat tamarmik ulluni makkunani sammineqartorujussuupput. Taamaammat kommunit neriuutigaat ullut pingasut ingerlaneranni siunissaq ungasinnerusoq isigalugu iliuusissat aalajangersorneqarsinnaajumaartut. Kommuneqarfiit kattuffianni Kanukoka-mi siulersuisut saniatigut kommunaldirektørit, aningaasaqarnermut direktørit kommunenilu aatsitassat pillugit suliaqartut kiisalu IT-mik suliallit isumasioqatigiinnermi Nuummi Hans Egedemi ingerlanneqalersumi peqataapput.
- Kommunit tamarmik nukipparujussuit IT atorlugu attaveqarnermut atortarpaat anguniarparpullu IT-mi atortorissaarutitta ajornartorsiutitaqanngitsumik Namminersorlutik Oqartussat atortorissaarutaannut attaveqarsinnaassasut. Tamanna inissippat sulisut suliassanut allanut piffissaqarnerulissapput. Isumasioqatigiinnissami iternga tikillugu oqallinniarpugut tamatumalu kingorna ataatsimoorussamik siunissaq pillugu pilersaarusiorluta, Kanukoka-mi siulittaasoq Martha Abelsen KNR.gl-mut oqarpoq.
Suliassat annersuut, uuliasiorneq aatsitassarsiornermilu suliat tusagassiutini sammineqartorujussuupput, tamatumalu oqallisigineqarnissaa kommunini qulliunerusut pisariaqartissimavaat.
- Tamanna pinngitsoorata oqaluuserisariaqarparput taamaasiunngikkutta oqallinnermi katataasussaavugut. Sammisanut ataatsimoorluta isummertariaqarpugut aammalu ilisimasat pigisavut paarlaasseqatigiissutigisariaqarlugit. Tamanna naammassippat sulianut annertuunut kommuni piareersimanerulissapput. Tamannami tassaavoq Kalaallit Nunaata siunissaanut pingaarutilerujussuaq, Martha Abelsen oqarpoq.
Nunami annertuumik suliffissaaleqiffiusumi suliassat assigiinngitsut suliffissaaleqinerup akiorniarnerani sakkussaqqissuupput. Suliffissatut periarfissat amerlaqaat, taamaattoq unammilligassat assigiinngitsut uuliasiornerup aatsitassarsiornerullu nassaratariumaagai kommunit eqqumaffigisariaqarpaat.
- Suliffissarpassuit nunatsinni piumaqaagut aammali nalunngilluarparput avataaniit suliartortorpassuit takkussorumaartut. Pingaarnerpaarli tassaavoq maani najugaqartunut suliffissat pilersinnissaat. Taamaammat pisariaqarpoq sulisussat piukkunnarsarnissaanni unammilligassat kommuninit piareersimaffigineqarnissaa. Assut qilanaarpugut tamakku ulluni aggersuni oqaluuserinissaannut, Martha Abelsen oqarpoq.
