Kommunit tamarmik sinniisuutitaqarnissartik qulakkeertussaassavaat

Kommuneqarfiit maannakkut 18-iusut kommunerujussuanngortussani sisamani tamarmik sinniisuutitaqarnissartik qulakkeertussaassavaat. Kommune-t kattussuunneqarnerinnaanni tamanna ingerlanneqassanngilaq; kommunelli aaqqissuussaanermik iluarsartuuteqqinneqarneranni ataavartumik atuuttussaassalluni.

Aaqqissuussaanermik iluarsaaqqinnermi Inatsisartut ataatsimiititaliaata taama innersuussinera amerlanerussuteqartoq, nipeqarpoq, kommunet pillugit iluarsaaqqinnissamik inatsisartuni ullumikkut aappassaaneerneqarnissaanut tunngatillugu. Amerlanerussuteqartut tassaapput partiit tamarmik, Demokraatit kisiisa minillugit, naalakkersuisut siunnersuuteqarnerigaluat qaangerlugu taama amerlanerussusiisoqarpoq. Naalakkersuisut siunnersuutigigaluarpaat ikaarsaariarnissami maannakkut kommuneqarfiusuni ukiuni sisamaannarni sinniisuutitaqarnissaq ingerlanneqassasoq.

Ataatsimiititaliap isumaa Inatsisartut malissappassuk,

tamatuma kingunerissavaa, inatsisartut ukiamut katersuunnissaannut nutaamik qinersisarnermut atatillugu kommuneqarfinni atorneqartussamik inatsisiliortoqarnissaanik saqqummiussisoqassasoq.

Nunarput tamakkerlugu sinniisuutitaqartoqarnissaa inatsisissap taassuma isiginiartussaavaa.

Siumut, IA, Atassut, Kattusseqatigiit Partiiat kiisalu attaviitsoq, Esmar Bergstrøm, isumaqarput

maannakkut kommuneqarfiit tamarmik kommunalbestyrelsemi minnerpaamik ataatsimik ataavartumik iluarsaaqqinnissaq eqqarsaatigalugu issiasuutitaqartariaqassasut.

Demokraatilli isumaqarput nunarput tamaat eqqarsaatigalugu ilaasortaatitaqarnissami nalingiisitsisoqarnissaanik tunngaviusumik eqqarsariaatimut siunnersuut akerliusoq, qinersinissamilu taasineq ataaserluunniit nalituupilussuusoq. Tamatumalu kingunerissagaa ilaasortat ilaasa nammineq illoqarfik angerlarsimaffigisartik kisiat sinniissuuffigilissagaat kommunep tamarmiusup soqutigisaa aallaaviginagu, illua´tungiliuttut taamatut naviasaaripput.