Kommunit tallimat suli borgmesterinngortitsingillat

Kommunimut qinersinermi inernerit kommunini amerlanerni pissarsiarineqareerput, kommunilli tallimat ukiuni sisamani kina borgmesteriussanersoq suli aalajangiutinngilaat.

Tasiilami Siumut amerlanerussuteqarlutik kommunalbestyrelsemut inissani aqqaniliusuni arfinillit pissarsiarivaat, kina borgmesterinngussanersoq suli aalajangiunneqanngilaq.

Qinigaanerpaasoq Jaappili Boasen imaluunniit qinigaaffimmi kingullermi borgmesteriusoq Vittus Mikaelsen borgmesterinngorsinnaallutik.

Qaqortumi Uummannamilu aamma assinganik pisoqarpoq, tassa qinigaaffimmi kingullermi borgmesteriusumit allamit qinigaanerusoqarami. Qaqortumi Simon Simonsen Tommy Marø-mit qinigaaneruvoq, Uummannamilu Jens Lars Fleischer Borgmesteriusumit Jakob Petersen-imit qinigaanerulluni.

Paamiuni Lars Sørensen Inuit Ataqatigiinneersoq qinigaanerpaavoq, borgmesteritulli ingerlaannassanersoq suli nalornissutigineqarpoq, amerlanerussuteqartut assigiinngitsutigut inissititerneqarsinnaagamik. Tusakkat kingulliit naapertussagaanni isumaqatiginninniarnerit Inuit Ataqatigiit Siumukkullu akornanni ingerlanneqaleruttorput.

Narsami aamma suli borgmesterinngortussaq suli aalajangiunneqanngilaq. Atassut, Siumut Inuit Ataqatigiillu borgmesterinngortitsisinnaapput, ilimagineqartorli tassaavoq Siumumeersoq Kiista P. Isaksen.