2018-imut aningaasanut inatsit: Kommunit suliassat 90 millionit koruuninik nalillit isumagisussanngoraat

Suliassallu isumaginissaannut kommuninut ataatsimoortumik tapiissutit 90 millionit koruuninik ilaneqarput. Tamanna Nalaakkersuisut aningaasanut inatsisissatut siunnersuummut allannguutissatut siunnersuutaanni atuarneqarsinnaavoq.

AAMMA ATUARUK Sinneqartooruteqarnermit amigartooruteqarninngortoq

Tunniussinermi piumasaqaataasut Naalakkersuinikkut Ataqatigiissaarisartoqatigiinnit, Naalakkersuisunit borgmesterinillu peqataaffigineqartunit, isumaqatigiinniutigineqarlutik naammassineqarput.

Chemnitz Narupip tunniussineq iluarisimaarpaa

Kommunit suliassap isumaginissaanut 90 millionit koruuninik aningaasaliiffigineqarput, kommunillu tamarmik immikkut aningaasanik qanoq amerlatigisunik tunineqarnissaannut malitassiortoqarpoq.

Aningaasaliissutit 75 procentii kommunini meeqqat 0-imit 15-inut ukiullit amerlassusaat naapertorlugit agguarneqassapput, 25 procentiilu najugaqarfiit ikinnerpaamik tallimanik meerartallit amerlassusaat naapertorlugit agguarneqassallutik.

Suliassamik tunniussisoqarneratigut Kommuneqarfik Sermersooq ukiumut 32 millionit koruuninik amerlanerusunik aningaasaliiffigineqartalissaaq, borgmesterillu Asii Chemnitz Naruipip tamanna nuannaarutigaa:
 
-  Kiisami isumaqatigiissuteqartoqarnera nuannaarutigaara. Atuarfinnik ulluuneranilu paaqqinnittarfinnik nutaanik sanaartornermut tunngatillugu nammineerluta pingaarnersiuisinnaanngorpugut, Asii Chemnitz Narup KNR-imut taama oqarpoq.

EU-mik suleqatigiinnissamik isumaqatigiissut naapertorlugu Nunatta pisortat missingersuutaasa tamarmiusut 25 procentiisa ilinniartitaanermut atussallugit pisussaaffigigaa Naalakkersuisut allannguutissatut siunnersuutaanni atuarneqarsinnaavoq.

90 millionit koruunillu pineqartut naatsorsuinermut tassunga ilaatinneqarput, taamaammat kommunit aningaasat taakku atualernissamut piareersarnermut atuarfinnullu tunngasuni sanaartornermuinnaq aserfallatsaaliuinermuinnarlu atorsinnaavaat.