Kommunit sisamaannaat meeqqanut politikkeqarput
Kommunit 18-it akornanni taamaallaat sisamat meeqqanut inuusuttunullu politikkeqarput, taamaanneralu sumiginnaanertut nalilerneqarsinnaasoq, politikkimik misissuisimasoq Inerisaavimmilu atorfilik Peter Dahler Larsen oqarpoq.
- Kommunit meeqqanut inuusuttunullu politikkeqanngitsut sumiginnaasutut taaneqarsinnaapput. Inerisaavimmi atorfilik professor Peter Dahler Larsen naliliivoq.
Kommunit meeqqanut inuusuttunullu politikkeqarnerat pillugu Peter Dahler Larsen misissueqqammerpoq, Meeqqat Inuusuttullu Pillugit Ilisimasaqarfik, naalisarlugu MIPI sullillugu.
Misissuinerata takutippaa, kommunit sisamaannaagallartut, tassaasut Ilulissat, Qasigiannguit, Aasiaat Nuullu kisimik meeqqanut inuusuttunullu politikkimik ilusilersuisimasut.
- Kommunit 2001-imili politikkiliorniarlutik isumaqatigiissimapput. Taamaattumik maannamut sisamaannaat naammassisaqarsimanerat eqqumiiginalaanngitsuunngilaq, pingaartumik meeqqat inuusuttullu atugarisaat kingullertigut oqallisigineqangaatsiarnerat eqqarsaatigalugu. Peter Dahler Larsen oqarpoq.
Kommunit meeqqanut inuusuttunullu politikkillit assigiinngitsunik siunniussaqarsimapput, soorlu meeqqat pisinnaatitaaffiinut, peqqissuunissaannut, meeqqat tamarmik meeqqerivinni inissaqartussaatitaanerannut imaluunnit sumiginnakkat ikiorneqarnissaannut tunngasinnaallutik.
- Soorunami imaanngilaq, allanngorlugu politikkeqaraanni suna tamarmi iluarsissasoq. Pingaarnersiuinissaq, timitaliinissaq minnerunngitsumillu kikkut tamarmik, soorlu qinikkat, suliffeqarfiit, innuttaasut - aamma meeqqat inuusuttullu suleqatigiillutik politikkimik ilusilersuillutillu nalilersuiuarnissaat pingaaruteqarpoq. Peter Dahler Larsen erseqqissaavoq.
Kommunit politikkiliornissamut kingulerussimasut aallartinnissaat minnerunngitsumillu erseqqissunik tigussaasunillu politikkiliornissaat kaammattuutigineqarpoq. Taamaatuttaaq paasissutissat pingaarutillit politikkiliornissamut amigaatigineqarsinnaammata aallartereernissaq kaammattuutigineqarpoq.
- Politikkeqarnerup tamanut ersersissavaa, pimoorussisoqartoq, suna anguniarneqarnersoq, anguniakkat naammassinissaannut aningaasaliisoqartartoq, pingaarnersiuisoqartartorlu. Aamma meeqqat kommuneminni pitsaanerusumik periarfissagissaarnerusumillu peroriartorfissaqalersinnaanerannik kinguneqarsinmnaavoq. Peter Dahler Larsen oqarpoq.
Peter Dahler Larsenip nalunaarusiani pingasunngorpat unnukkut saqqummiutissavaa, tamannalu pissaaq Meeqqanut inuusuttunullu suliniutit pillugit tamanut ammasumik Peqqissaanermik Ilinniarfimmi pingasunngorpat unnukkut oqallitsitsinissami.
