Kommunit qarasaasiatigut atortorissaarut atuinnarsinnaagaat

Danmarkimi Naammagittaalliuteqartarfiup aalajangiinera naapertorlugu, peqatigiiffiup SBSYS-imik piginnittup atortorissaarummik allanut tuniniaanera, soorlu assersuutigalugu nunatsinni kommuninut, inatsisinik unioqqutitsineruvoq.

Taamaammat kommunit atortorissaarummik siunissami atuinissaannut aaqqiissutissarsiortoqassaaq. Arlalinniilli oqaatigineqarpoq kommunit ernumassutissaqanngikkallartut.

Danmarkimi kommunit peqatigiiffiat, taaguuteqartoq Brugerklubben SBSYS, qarasaasiatigut atortorissaarummik SBSYS-imik piginnittuuvoq, atortorissaarummillu tamatuminnga atuinissamut Kommuneqarfik Sermersooq, Kommune Kujalleq, Qaasuitsup Kommunia aamma KANUKOKA akiliillutik akuersissummik pigisaqarput.

Kommunit qarasaasiatigut atortorissaarut allagaatinik sulianillu suliaqarnerminnut inatsisinillu eqqortitsinissamut atortarpaat, ilaatigut allagaatit eqqortut sulisunit atorneqarnissaat qulakkeertarlugu piffissaliussallu pingaarutillit pillugit aamma eqqaasitsissuteqartarluni.

Danmarkimili Naammagittaalliuuteqartarfiup aalajangiineratigut Brugerklubbenip qarasaasiatigut atortorissaarummik allanut tuniniaanera, ilaatigut nunatsinni kommuninut, inerteqqutaalerpoq.

Taamaammat nunatsinni kommunit atortorissaarummik siunissami atuiinnarsinnaanissannut aaqqiissutissarsiortoqassasoq, Brugerklubbenip ingerlatsinermi aqutsisooqatigiivini siulittaasoq, Anders Bjært Sørensen, KNR-imut taama oqarpoq.

Nunatsinnili kommunit ernumassutissaqanngikkallartut erseqqissaatigaa.

- Atortorissaarummik maanna atuuttumik atuisinnaatitaapput. Aamma aaqqiissutissamik qanoq ikkaluartumilluunniit nassaartoqaraluarpat, siulittaasoq oqarpoq.

Pisortani ingerlatsinermik digitalinngortitsinermut immikkut ilisimasallip, Per Andreasenip, kommunit ernumassutissaqannginnerat isumaqataaffigaa.

- Qarasaasiatigut atortorissaarutip pisinnaasai iluarigunikkit atuinnarsinnaavaat, immikkut ilisimasalik oqarpoq.

Aaqqiissutissamilli nassaarnissaq iluarnerpaassaaq, atortorissaarutimmi teknologiia pisoqalissaaq, taamaammat Brugerklubbenip imaluunniit atortorissaarummik ineriartortitsisup isumaqatigiissuteqarfiginissaa pisariaqassaaq atortorissaarutip atorneqarsinnaanera sivitsorumallugu.

- Piaartumik isumaqatigiissusiortoqartariaqarpoq, taamaaliornikkut ukiut marluk-pingasut qaangiutinnginnerini qanoq-iliortoqassanersoq paasineqarniassammat, immikkut ilisimasalik taama oqarpoq.