Kommunit qaffaanikkut artukkerneqarput
Nunatsinni kommunini tamani napparsimavinnut akiuliutaasartut qaffattussanngorput, tassami
Peqqissutsimut Naalakkersuisoqarfik ullumikkumiit atuutilersumik napparsimasut paaqqutarisariaqartut napparsimavinniitinneqarnerinut akinik qaffaavoq.
Tamanna kommuneqarfiit kattuffiannit Kanukokamiit aammalu kommuninit ataasiakkaanit tassanngaannartumik pisutut isigineqarpoq.
Kommuninilu aningaasaqarnikkut killissaminiinnerit ilagaat Qasigiannguit.
- Pipallannertut uanga taarusuppara kommunit soorunami siunissaq ungasinnerusoq eqqarsaatigalugu aningaasartuutissaminnik aaqqissuussisarput taakkulu aallaavigalugit sulineq ingerlasarluni. Taamaammat ullut arfineq-pingasuinnaat quliinnaat periarfissaqartitsilluni millioninik arlalinnik nalilinnik aningaasartuuteqarnerulernissatsinnik nalunaarfigineqarnerput akueriuminaatsorujorujussuuvoq, Qasigiannguit borgmesteriat Jes Svane taama oqarpoq
Napparsimasumut paaqqutarineqartariaqartumut inummut ataatsimut unnuamullu ataatsimut unnuisitsineq siornatigut 917 koruuninik naleqarsimagaluarpoq. Maannali unnuamut akit assigiinngitsunik marlunnik qaffariaateqarput, inuup uninngasup qanoq ikiortariaatiginera apeqqutaatillugu qaffaasoqarluni. Tassalu akikinneq unnuamut 1086 koruuniuvoq akisunerlu 3686 koruuniussalluni.
- Ilissi kommunissinni qanoq annertutigisumik qaffaasoqassava?
- Naatsorsukkagut maannamut malillugit massakkut uninngasuutigisagut aallaavigalugit 2,3 – 2,5 millionit akornanni aningaasartuuteqarnerulissaagut, Jes Svane oqarpoq.
Qasigiannguilli kommuniat kisimi taama massuaateqanngilaq aammali Nuup kommuniata taama pisoqarnera nuannarinngivippaa.
- Nuup kommuniata akuerisinnaanngilluinnaqqissaarpaa una massakkorpiaq aki taaneqartoq. Kanukokap Hjemmestyrellu isumaqagiinniutigeqqaartariaqaraat uagut isumaqarpugut, ukua akinut tunngasut akueriuminaatsupilussuugamik taamak annertutigisumik qaffaanerit. Ukioq kingulleq uagut 174.000-t sinnerlugit atoratsigit taavalu massakkut qaffaassappata 744.000-t sinnerlugit aningaasartuutigisussanngussagatsigit taakkulu annertuupilorujussuupput, Ane Egede Mathiussen oqarpoq.
- Aalajangiineq taanna ullumikkuminngaanniit atuutilertussatut aalajangigaavoq. Taamatut qaffaaneq qangalili nalunngereerpisiuuk?
- Siorna ilimasaarikannerpaat taamaallaat. Imatut nalunaarfigineqanngilagut una ullorlu una qaffassasut
Taama oqarpoq Nuup Kommuniani inunnik isumaginninnermi ataatsimiititaliami siulittaasoq Ane Egede Mathiussen. Taanna isumaqarpoq, Namminersornerullutik Oqartussat Kanukokalu isumaqatiginninniareerpata aatsaat iliuuseqaqqissinnaallutik.
