Siusinaartumik pensionisiallit ilaasa pensionisiat qaffaataannik inummut tapisiaminnit ilanngaatigitissimagaat Naalakkersuisut paasivaat.
- Tamanna siusinaartumik pensionisiat pillugit inatsimmut naapertuutinngilaq, tassami inummut tapit pisariaqartitanik immikkut naliliinikkut tunniunneqartarmata, Isumaginninnermut Naalakkersuisoqarfik tusagassiuutinut nalunaarummi taama allappoq, erseqqissaatigalugulu:
- Ukiorpassuarni akit iluarsineqartarsimannginnerisa kingunerisaannik pensionisianik qaammammut 1000 koruuninik qaffaaneq 'aningaasaqarnikkut atukkat allanngornerisut' isigineqarsinnaanngitsoq naalakkersuisut tusagassiuutinut nalunaarummi taamatut ilisimatitsipput.
Isumaginninnermut Naalakkersuisoqarfiup siusinaartumik pensionisiat pillugit ilitsersuummik nutarterileruttorpoq.
Inatsisartut aningaasanut inatsisaanni 2010-mi atuuttumi, siusinaartumik pensionisiat qaammammut 1000 koruuninik qaffanneqarnissaat upernaaq akuersissutigaat.