Kommunit: Nassuiaatissat ujartorneqarput
Tamatumani ilaatigut pineqarlutik akileraarutinut akiliisitsiniartarnermullu tunngasut kommuninit Namminersorlutik Oqartussanut nuunneqarnerisa kingunerisaanik, akiliisitsiniartarneq kommunit nanertuutigeqisaannik malinnaasinnaajunnaaqqammat.
- Tamannalu kommunit innuttaasunik sullissinerannut sunniuteqarpoq, Apollo Mathiassen Qaasuitsup Kommunianit ataatsimeeqataasoq oqarpoq, tamannalu kommunit sinnerinit isumaqatigineqarpoq taperserneqarlunilu.
- Akileraartarnermut akiliisitsiniartarnermullu tunngasunut ilungersorluta aaqqiissuteqassalluta neriorsuutigaara, Kanukokap siulittaasua, Enok Sandgreen oqarpoq.
Kommunit innarluutilinnik isumaginninnermik tigusinissaraluisa kinguartinneqarnera, kommuninit uparuarneqaqqippoq.
- Piareersimagaluarpugut, kinguartitsinerlu paasisinnaanngilarput, Qeqqata Kommunianit aallartitaq, Karl Davidsen oqarpoq, kinguartitsinerli atorluarneqartariaqartoq Kanukokap siulittaasuanit oqaatigineqarpoq. Tamatumunngalu atatillugu Kanukokap siulittaasuata pisup malersorneqaqqinnissaa neriorsuutigaa.