Kommunit namminneq pisussaaffilertarnerat tatigineqarpoq
Ilinniartunut inissiat 30-t Sisimiuniittut malittarisassanut naapertuuttunngorsarnerat atorfilittat sanasullu maannakkut suliaraat. Pisortat illuutaat allat assigalugit ilinniartunut inissiat, issiavinnik kaassuartakkanik atuisunit pitsorluuteqartuniillu inissiat tamanit atorneqarsinnaanerat pillugu maleruagassanik eqquutsitsinngillat. Ilinniartunut inissiat Sisimiuniittut, kommuni nammineq sanaartortitsisuummat immikkuullarissutigaat.
Sanaartortitsisumut aamma nakkutilliisumut tunngatillugu erseqqissarneqassaaq, tamatigut sanaartortitsisoq akisussaasuummat, Ineqarnermut, Attaveqarnermut Angallannermullu Naalakkersuisoqarfimmi immikkoortumut pisortaq, Klaus G. Hansen oqarpoq.
Kommunit sanaartornermik nakkutilliisuupput, taamaalillunilu, sanaartornissamut akuersissutinik kommunip tunniussinerini tamani inissiat tamanit atorneqarnissaanerat pillugu anguneqarsimanngippat, sanaartortitsisoq kommunimit pisussaaffilerneqassaaq.
Ilinniartut inissaannik sanaartortoqarnissaanik akuersissummik tunniussisoqarmat, taamani Sisimiut kommuniusoq taamaalilluni pisussaaffiliisimasussaagaluarpoq.
Inissiat tamanit atorneqarsinnaannngortinnerat aningaasanik naleqarpoq.
Inip alliup qutseqataanik isaariaqalersillugu majuarissat sananeqartussaapput, matullu ima nerututigissapput issiavinnik kaassuartakkanik atuisunit iserfigisinnaassallugit. Kommunip illuutaasa tamanit atorneqarsinnaanissaat angujumallugu Qeqqata Kommunia 2 miliuunit koruuninik ukiuni tullerni marlunni atugassanik illikartitsisimavoq.
Ombudsmandip suliamut akuliunnerata kingorna Qeqqata Kommunianik Naalakkersuisoqarfiup malinnaanerata nalaani Nunatsinni kommunini allani pingasuusuni sanaartornerit nakkutigineqanngillat.
- Inatsisip kommuninit tamanillumi malinneqarnissaa nalinginnaasumik naatsorsuutigisarparput, taamaammallu kommunit taama iliunnginnissaat naatsorsuutigisarlugu. Suliassaqarfimmi maleruagassat nutaajukannersuupput, assersuutigalugut inissiat tamanit atorneqarsinnaanerat pillugu maleruagassaq taaneqarsinnaavoq, Klaus G. Hansen ima oqarpoq.
Piffissallu ingerlanerani atorneqariartorsimavoq kommunillumi aamma ilikkagassaqarsimallutik. Suliassaqarfillu pineqartorpiaq pillugu oqallinnerup nassatarisaanik kommunini oqartussat aamma qitiusumik oqartussat suliassaqarfimmut malinnaanerulersimasut oqarsinnaasoraanga.
