Kommunit: Namminersorlutik Oqartussat iliuuseqartariaqarpoq
Meeqqat inuusuttuaqqallu ulloq unnuarlu angerlarsimaffinnut inissinneqarnissaminnut utaqqisut nuna tamakkerlugu 24-iusut, ilaatigut Danmarkimut aallartinneqartariaqartarput Nunatsinni angerlarsimaffissaqannginnertik pissutigalugu. Nunatta avataanut inissiisoqarani Nunatsinni ulloq unnuarlu angerlarsimaffinnik upalungaarsimasunik peqartariaqartoq oqaatigineqarpoq.
Kommune Kujallermi inunnik isumaginninnermut pisortap Mikkel Pallep, ataasinngormat radioavisikkut sakkortuumik uparuarpaa Nunatsinni ulloq unnuarlu najugaqarfiit ikippallaarneri. Maannalu Kommune Kujallermi meeqqat pingasut ulloq unnuarlu najugaqarfinnut nunatsinniittunut inissinneqanngippata, Danmarkimut una qaammat aallartinneqariaannaasut.
Mikkel Pallep, Namminersorlutik Oqartussanut uparuaanera Qaasuitsup Kommuniani inunnik isumaginninnermut pisortamit Magga Fenckerimit taperserneqarpoq.
- Ukiuni arlalissuarni Kommuuninit noqqaassutigiuarsimavarput, maani Nunatsinni meeqqanut inuusuttuaqqanullu najugaqarfiit amerlanerusut pigisariaqarivut. Taamaammat Kommune Kujalliup oqariartuutaa amerlanerusunik, ulloq unnuarlu angerlarsimaffinnik pilersitsinissaq isumaqatigaara, Qaasuitsup Kommuniani inunnik isumaginninnermut pisortaq Magga Fencker oqarpoq.
Qeqqata Kommuniani ilaqutariinnermut ataatsimiititaliami siulittaasoq Bitten Heilmann Atassummeersoq, aammattaaq tapersiissuteqarpoq.
- Kommuunit allatuulli meeqqanut ulloq unnuarlu angerlarsimaffiinik pisariaqartitsivugut, taamaammat Kommune Kujalliup oqariartuutaa isumaqatiginartorujussuuvoq, Qeqqata Kommuniani ilaqutariinnermut ataatsimiititaliami siulittaasoq Bitten Heilmann oqarpoq.
Meeqqat inuusuttuaqqallu angerlarsimaffiup avataanut inissinneqarnissaminnut utaqqisarneri ilaatigut ukiup affaaniit ukiup ataatsip tungaanut sivisussuseqatarneri Kommune Kujallermit oqaatigineqarpoq.
Namminersorlutik Oqartussanit paasitinneqarpugut, meeqqat inuusuttuaqqallu 24-it maannamut ulloq unnuarlu angerlarsimaffinnut inissinneqarnissaminnut utaqqisuutigineqartut. Utaqqisoqarani Namminersorlutik Oqartussat sillimasariaqartut Magga Fencker isumaqarpoq.
- Soorunami inissanik amerlanerusunik pilersitsisoqartariaqarpoq, piareersimasoqartariaqarlunilu. Tassami tassanngaanaq meeqqanik inuusuttuaqqanillu inissitassatsinnik takkuttoqartarpoq, uagullu ilaatigut inissiivissaqartittarnatigit Qaasuitsup Kommuniani inunnik isumaginninnermut pisortaq Magga Fencker oqarpoq.
