Kommunit nalunaarfigeqatigiittarnissamik pisussaaffilerneqartassapput
- Kalaallit meerartaat ajornartorsiortut ilaginnassanngilavut. Taamaattuminguna taakku piaarnerpaamik maluginiarneqartarnissaat pingaaruteqartoq, Danmarkimi inunnik isumaginninnermut ministeri, Karen Hækkerup, naalakkersuisoqatiminik, Mimi Karlsenimik, ataatsimeeqatereerluni taama oqarpoq.
Kommunit imminnut nalunaarfigeqatigiittarnerat Danmarkip killeqarfiisa iluini atuutereerpoq, Kalaallit Nunaatali Danmarkillu akornanni ilaqutariit avaqqullugit paasissutissanik avitseqatigiittarnissaq inatsisit malillugit inerteqqutaavoq. Inatsisillumiuna taassuma allanngortinniarneqarnera taakku naqissuseraat.
- Meeqqat Danmarkimut nuuttartut pitsaasumik ineriartornissaat toqqissisimallutillu meeraanissaat uanga pingaartittorujussuuvara. Taakku pitsaasumik aallartittariaqarput, taamaattumillu paasissutissanik paarlaasseqatigiittassaagut, naalakkersuisunut ilaasortaq, Mimi Karlsen, oqarpoq.
Soorlu KNR-imi sapaatip-akunnerata aallartilaarnerani oqaluttuarineqartoq, Kommuneqarfik Sermersuup Aalborgillu Kommuniata kommunitigoortumik suleqatigiilernissaat anguniarlugu suliniartoqalereerpoq, kisiannili tassa, kommunit paasissutissanik paarlaasseqatigiissinnaalernissaat pitinnagu, ilaqutaasut akuersiteqqaartarnissaannik piumasaqarneq maanna killilersimaarneqarpoq.
