Kommunit milliardimik ataatsimik pissarsipput

Aningaasaqarnermut naalakkersuisoq, Maliina Abelsen aamma Kanukokap siulittaasua, Martha Abelsen, 2012-imut kommuninut ataatsimoortumik tapiissutit pillugit ippassaq atsioqatigiipput.
Allattoq Apollo Jeremiassen
oktobarip 04-at 2011 14:23

Isumaqatigiissut 1062 millionit koruuninik naleqartoq -  ukioq kingullermut sanilliullugu 18 millionit koruuninik amerlaneriaateqarpoq.

Illuatungeriinnili isumaqatigiinngissutaasoq ataaseq ataatsimiititaliami suliarineqartussanngorlugu ullumi ingerlateqqinneqarpoq.

2012-imut aningaasanut inatsisissamut tunngatillugu Naalakkersuisut siunnersuutigeqqaaraluarpaat, kommunini najugaqariaatsip ineriartorsimanerata - tassa kommunimi qanoq amerlatigisunik inoqarnera qanorlu ukiumikkut agguataarsimanerisa kingunerinik, kommunit missingersuutaannut tamanna naleqqussarneqassasoq.

Soorlu assersuutigalugu meeqqat atuartussaatitaasut ikilisimanerannut aamma kommunimi utoqqaat amerliartornerannut attuumasumik atuarfeqarfiup utoqqarnillu isumassuinerup akornanni aningaasat atugassiissutigineqartut nuunneqarnerisigut.

Siunnersuut kommunini aalassatsitsivoq, tassami sumi najugaqarnerup missingersuutinut ilanngunneqartalernissaat piffissaannginnerarneqarmat. Tamatuma kingunerisaanik suleqatigiinnik suligasuartussanik, sumi najugaqariaaseq pillugu missingersuutinut ilanngussisoqartalernissaa pillugu apeqqutinik qulaajaasussanik pilersitsisoqarpoq.

Ajornartorsiulli taanna qaangerneqarpoq, ataatsimoorussamik tapiissutit piffissaagallartillugu Inatsisartuni kommuninilu suliarineqarlutillu akuersissutigineqarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq