Kommunit meeqqanut inuusuttunullu politikkeqanngillat
MIPI-p naatsorsuinera tamanna kommuninngortussat meeqqanut inuusuttunullu politikkeqartariaqarnerannik kajumissaarutaasoq, MIPI-mi suleqataasup Avijâja Absalonsenip oqaatigaa.
- Suliniutigilersaakkanut tigussaanerusumik eqqarsartoqarsinnaasariaqaraluarpoq, qulaaninngaanniit aqutsinerit kisiisa pivallaarunnaamillugit. Assersuutigigutsigu qulaaninngaanniit politikkissatut allanneqarsimappat meeqqat inuusuttullu sunngiffimminni allanngorartumik atugaqartitaanerusariaqartut, taava uagut tungitsinniit isumaqassaagut tigussaanerusunik suliniutissanik takussutissiisoqarnerusariaqartoq, aperaluta sorpiaanuku suliniutigineqarniartut? Taava tamanna itisilerlugu nassuiarneqartariaqaraluarpoq soorlu aperaluni kikkunuku suliniutit tamakku isumagisassarigaat. Inuusuttut sunngiffimmi ornittagaat fritidsklubbit aqqutigalugit isumagineqassappat? Imaluunniit kommuni aqqutigalugu allakkoorlugit suliniutigineqassappat? Qanorpiaruna kissaateqartoqartoq? Suliniutigilersaakkat aningaasassaqartinneqarpat? Soorlu tamakkunatigut itisiliisoqartariaqaraluarpoq qulequtsiiginnartutullusooq pinnani.
MIPI-mit misissueqqissaarnerup ersersippaa, kommunit ataqatigiissaagaanngitsumik suleriaaseqartut. Taamaattumik MIPI-p kajumissaarutigaa kommunit akunnerminni isumassarsiaminnik paarlaateqatigiinnerusariaqartut.
