Kommunit marluk kattussinnaapput
Sisimiormiut Maniitsormiullu juunip aappaani ataatsimiinnerminni aalajangiuppaat, kommunit taakku marluk kattussinnaanerannut tunngasunik sulinermik aallartitsisoqassasoq.
Kommuninit taakkunannga marluusuniit Aningaasaqarnermut ataatsimiititaliat kommuninut allanut attaveqarsinnaanerminnut pisinnaatitaaffilerneqarput, tamatumalu inernerigallarpaa, kommuninit taakkunannga marluusunit sinniisulerlugu suleqatigiissitamik oqaloqatigiittussamik pilersitsisoqarneranik.
Illuatungeriit isumaqarput pissutsinik assigiinngitsorpassuarnik suli nalorninartunik peqartoq, taamaatumillu Naalakkersuisut ukioq ataaseq sinnilaarlugu piffissaliinikuunerat naammanngitsoq.
Kommunit Tunumiunik suleqateqarsinnaanermut periarfissaq piviusorsiortuunngitsutut isigaat, imminnut ungasippallaarnerat, kulturikkut assigiinngippallaarnerat inuussutissarsiutinullu tunngasut ilaalu ilanngullugit eqqarsaatigalugit.
Ataatsimiinnermi aamma isumaqatigiissutigineqarpoq inuussutissarsiuteqarnerup, ilinniartitaanerup, kulturillu iluanni suleqatigiissinnaanerup avataatigut, nukissiuteqarnerup iluanni suleqatigiilluartoqarsinnaasoq. Aammattaaq Naalakkersuisunut saaffiginnissuteqartoqassasoq imeq atorlugu nukissiuteqarsinnaanermut ataatsimoorussamut periarfissanik misissuisoqarsinnaanersoq.
