Kommunit kattussuunnissaat kommuninit kinguarteqquneqarpoq
Kommunimi naalakkersuinermik suliaqartut kommunit ataatsimoortinneqarnissaata piffissalerneqarnissaat piumasaraat.
Kommuninut sisamanut ataatsimuulinnginnissaq sioqqullugu Aaqqissuusseqqinnissanut Ataatsimiititaliap suliaata itisilerneqarnissaa kommunit piumasaraat.
Piffissaqarnerorusuppugut!
KANUKOKA-mi aallartitaasut ataatsimeersuarneranni kommunini naalakkersuinermik suliaqartut ullumi oqariartuutaat taama ersaritsigaaq.
Aaqqissuusseqqinnissamut Ataatsimiititaliap ippassaq kommunit 18-t kommunerujussuarnut sisamanut ataatsimuulernissaannik eqqarsaatitik saqqummiutereeraallu ullumikkut kommunit qisuariarput.
Aallartitat tamarmik kommunit ataatsimoortinneqarnerisa kingunerisinnaasai itinerusumik ujartorpaat.
Aaqqissuusseqqinnerup kingunerisaanik sulisoqarnerup aningaasaqarnerullu piffissaqarluni iluarsiiffigineqarnissai Johanne Olsenip Ilulissaneersup tikkuartorpai.
Kommunit ataatsimoortinnginneranni naalakkersuinermik suliaqartut innuttaasullu oqaloqatigiinnerunissaat peqataasut arlallit ujartorpaat.
Kommunit ataatsimuulernissaannik eqqarsaatit innuttaasut aamma qisuariarfigisariaqaraat Qeqertarsuarmi borgmesteri Augusta Salling oqarpoq.
Qeqertarsuup, Kangaatsiap Aasiaallu kommuniisa Aaqqissuusseqqinnermi Ataatsimiititaliap ukiumi ataatsimi marlunniluunniit sulinera sivitsorneqassasoq piumasaraat.
Kitaata qeqqani kommunit Aaqqissuusseqqinnermi Ataatsimiititaliaq isornartorsiorpaat namminneq piumasaqaatiminnik tusaaniarsimanngimmat.
Ivittuuni borgmesterip Per Nukaaraq Hansenip Kujataani kommunit sinnerlugit Kujataani kommunit Tunumilu kommunit ataatsimuulersinneqarnissaanik siunnersuut saqqummiuppaa.
Kommunit qisuariaataat tunngavigalugit KANUKOKA-mi siulittaasutut tunuartup Jens Lars Fleischerip nalilerpaa Aaqqissuusseqqinnermi Ataatsimiititaliap suliani ingerlatiinnassagaa sivisunerusumik piffissaqartinneqarluni.
Jens Lars Fleischerip KANUKOKA-p siulittaasortaavanut siulersuisunullu kommunit sivisunerusumik piumasaqaataat ingerlateqqippaa.
Aaqqissuusseqqinnermi Ataatsimiititaliap suliani ukiamut naammassereertussaagaluarpaa.
