Kommunit kattussuunnissaat akuerineqarpoq

Kommunit aaqqissuuteqqinnissaat Inatsisartut akuersissutigeqqammerpaat, tassa kommunit 18-it sisamaannanngortinneqassallutik. Kommunillu sisamaannanngortinneqarnissaat tamanit isumaqatigineqarpoq.

Kommunit maannakkut 18-iusut tamarmik sinniisuutitaqarnissartik qulakkiissagaat, Inatsisartuni amerlanerussuteqartut aamma aalajangerpaat.

Demokraatit kisimik akerliupput.

Siumup oqaaseqartartua, Lars-Emil Johansen, maanna attaveqarfigaarput, Lars-Emil Johansen Inatsisartut ataatsimiitarfianni ilisimatitsivoq, kommunit tamarmik sinniissuutitaqarnissaat Siumup nuannaarutigivallaanngikkaluarlugu akuersaaraa:

-Tassa siusinnerusukkulli oqaatigereersimavarput ikaarsaariarnermi, tassa qinersinermi siullermi,maannakkut kommuniusut tamarmik aallartitaqarnissaat qulakkeerneqartariaqartoq, unali nuannaarutigivallaanngikkaluarlugu akuerisarput unaavoq, ataatsimiititaliaq isumaliutissiissummini oqarmat, ataavartumik taanna aaqqiinerussasoq, uagut Siumuminngaaniit siunertariusarsimavarput qinersinermi siullermik atuuttumik taamatut aaqqiisoqassasoq.

Nunatsinni nutaamik aaqqissuussinerit ukiorpassuarni annersaanni, innuttaasut amerlasuut peqataanissaat, aamma suleqataanissaat, pingaartikkatsigu, taanna ikaarsaariarnermi siullermik taamatut aaqqiisoqarnissaa Siumuminngaanit isummerfigisimavarput, kisiannili massakkut ataavartumik taallugu aaqqiinertut ataatsimiititaliami amerlanerussuteqartut, aamma Siumup ilaasortaatitaasa, peqataaffigisaanni, taamatut aalajangerneq akuerisinnaagatsigu una ilanngullugu oqaasertaliuppara: Siunissami ataavartumik sumilluunniit Inatsisartut aalajangersaasinnaanngillat, taamaallaat sunaluunniit aalajangiussaq ataavartuussaaq, Inatsisartut nutaamik tullianik aalajangernissaasa tungaanut.