2009-mi januaarip aallaqqaataanit atuutilersussamik kommunit aaqqissuuteqqinneqarnerat atuutilissaaq, 18-iusimariarlutik sisamaannanngussagamik.
Suliaq aallartereerpoq, naammassisassalli amerlaqaat.
Kommunit kattussuunneqarniarnerisigut suut anguniarneqarpat?
Tassunga tunngatillugu misissuisimavugut:
Kommunit nammineq aalajangiisinnaassuseqarnerulissapput. Qanilaarnerusumik sullissisoqarnissaa anguniarneqarpoq, aalajangiinerillumi innuttaasunut qaninnerunissaat anguniarneqarluni.
Aaqqissuusseqqinnerit annertuut akikitsuinnaaneq ajorput.
Kommunerujussuit nutaat sisamat aningaasartuutissaat matussuserniarlugit Namminersornerullutik Oqartussanit 1 milliardi koruunit missaannik tunineqassapput. Tassa Danmarkimit ataatsimoortumik tapisiat sisamararterutaasa missaat kommuninut tunniunneqartalissapput.
Meeqqavut, ilaqutariit, ilinniartitaanerit, utoqqaat, sanaartorneq, suliffissuaqarneq, innuttaasullu toqqaannartumik sullinneqarnissaat kommunit pingaarnertut suliassaraat.
Kommunerujussuit atuutilersinneqannginnerini inatsisitigut tunngavissatut naammassisassat arlaqarput:
Kommuninut qinersisoqassaaq aappaagu apriilip arfineq-pingajuani, kingornalu kommunerujussuarnut ikaarsaarneq aallartissalluni.
Maannamut kommunalbestyrelsiusimasut ataatsimiititaliaagallartussallu kommunerujussuanngortussat sinnerlugit piginnaatitaaffigisinnaasassaat naalakkersuisunit aalajangerneqassapput.
Kommunit 2009-mi kattussuunneqarnissaannut suliassat ikinngeqaat, qinikkallu innuttaasullu akornanni oqallinneq aatsaat aallarteruttorpoq.
Kommunit 18-it maanna atuuttut Namminersornerullutik Oqartussanit 761,5 millioni koruuninik aappaagu tunineqassapput.