Kommunit kattussuunnissaannut kommunit pilersaarutinit allaanerusunik kissaateqarput

KANUKOKA-p aallartitaasa ataatsimiinneranni eqimattakkuutaarluni kommunit arlallit kattunnissaat oqallisigineqarpoq. Kommunit kattuffianit kommunit imminnut qaninnerit kattussuunneqarnissaat siunnersuutigineqarpoq. Eqimattat katillutik sisamaapput, siunnersuutigineqartorli apeqqutaatinnagu allatulaaq nuliarsartoqarpoq.

Eqimattami 3-mik taaneqarsimasumi kommunit imminnut ungasinnerpaat kulturikkullu assigiinngissuteqangaatsiartut ataatsimoortinneqarput. Eqimattami tassani Nuup, Paamiut, Illoqqortoormiut Tasiilallu kommunii oqallitsinneqarput. Kommunillu taakku kattutsinneqarnissaat soorlu imaannaassanngitsoq.

-Tunumi kisimiikkusulluta eqqartoreerlutigu, Namminersornerullutik Oqartussanut allakkanik nassiussereerpugut. Inissisimanerput eqqarsaatigalugu takorloorparput allannguuteqanngitsumik siunissami inissisimassalluta. Tasiilap Illoqqortoormiullu kommuniisa ataatsimoortinneqalernissaat suli naluarput. Taamaakkaluartorli Illoqqortoormiuni kommune suleqatigisaratsigu suleqatigiiginnarnissarput kissaatigaarput. Kattussunnissaq inatsisartuni eqqartorneqartussaavoq tassanngaanniillu aalajangiisoqassaaq kommunit sorliit kattussuunneqassanersut, Eli Abelsen oqarpoq.

Pinngitsaalineqarlutik kattussuutsinneqassagunik aamma kommunit takku marluk eqqartorsimavaat, Eli Abelsenilu nammineq isumaqarpoq, pinngitsaalineqassagunik Nuup Kommuneanik oqaloqateqarnissartik kissaatigalugu.

Eqimattani allani kommunit ima inissinneqarsimapput: Qaanaaq, Upernavik, Uummannaq, Qasigiannguit, Aasiaat Qeqertarsuarlu eqimattami oqallipput. Sisimiut, Maniitsoq Kangaatsiarlu oqallitsinneqarput kiisalu Ivittuut, Narsaq, Qaqortoq Nanortalillu aamma oqallitsinneqarlutik.