Kommunit kattussuunneqarnissaat akuersaariartorneqalerpoq

Kommunit kattussuunneqarnissaat innuttaasut ernummatigeriarlugu akuersaariartulerpaat. Aaqqissuussaanermut Ataatsimiititaliap suliani KANUKOKA-p ataatsimeersuarnerani saqqummiuttussaavaa.

Innuttaasut qanoq qisuariartarsimanerat Aaqqissuussaanermut Ataatsimiititaliap siulittaasuata Martha Labansen-ip oqaatigaa, aallaqqaataani innuttaasut ernumagisaraat taamak ungasitsigisumut kommunerujussuartut inissinneqalerunik immaqa puigorneqassallutik.

-Paasitinneqariaraangamik atortut periarfissallu atorluaraanni qanoq innuttaasunut sullissineq pitsaanerusoq anguneqarsinnaanersoq soqutiginnilertarput. Aamma taamaalilluni innuttaasut sinerissami oqartussaaffimmik annertunerusumik tigusinissaannut aqqutissat takusinnaalertarpaat, Martha Labansen oqarpoq.

Qitiusumi aqutsineq pivallaarnagu sinerissami ineriartornissaq assigiinngitsut periarfissinnissaat soqutiginartumik tigusaraat, Martha Labansen ilanngullugu oqaatigaa.

Innuttaasut nassuiaanneqarnermi kingorna kommunit kattunnissaat tukummersorfigivallaarunnaartarpaat.

-Tukummersortut soorlu ikilinerusartut taamatut periarfissaq qaninnerusumik oqaluuserileraangatsigu, taava qitiusumik aqutsineq qimassagaanni, taava soorunami sinerissami oqartussaaffiit annerusumik inissinneqarsinnaanissaat assut soqutiginartutut isigilertarpaat, Martha Labansen oqarpoq.

Ataatsimiititaliamit Qasigiannguit orneqqinneqassaaq, taassuma saniatigut Qaanaaq, Upernavik, Illoqqortoormiullu amigaataalissapput.