Kommunit kattunnissaat pinngitsaaliissutaassanngilaq
Kalaallit Nunaanni Kommunit Kattuffiata, KANUKOKA-p, ataatsimeersuarnerani aaqqissuussaanermut ataatsimiititaliap manna tikillugu suliarisimasai tunuliaqutaralugit kommunit aaqqissuussaanerat ullumikkut oqallisigineqassaaq.
Nanortalimmi borgmesteriusimasup, Nikolaj Ludvigsen-p, oqallisissiani ataatsimeersuarneq sioqqullugu nassiussimavaa.
Nikolaj Ludvigsen allappoq, kommunit aappaagu 2006-mi ataatsimuulerusunngitsut pinngitsaalillugit kattutsinneqarnissaannik aaqqissuussaanermut ataatsimiititaliap siunnersuutaa akuersaarneqarsinnaanngitsoq.
Nanortalimmilu kommunalbestyrelsimut ilaasortat ilaannit, KANUKOKA-p ataatsimeersuarnerani peqataasumit, Henrik Brummerstedt-imit, Nikolaj Ludvigsen taperserneqarpoq.
Kommunit kattunnissaminnut pinngitsaalineqarnissaat Ammassallip Qeqertarsuullu Kommune-annit aamma isumaqatigineqanngilaq.