Kommunit kattunnissaat pillugu saqqummiussipput

Kommunit kattunnissaat pillugu Narsami ullumi isumasioqatigiinneq nangillugu Narsami, Qaqortumi Nanortalimmilu kommunimut qinikkanik atorfilittannillu inuttaqartup qitiusumik politikkikkut aqutsinissap ilusissaa siunnersuutigaat.

Eqimattap oqaluuserai teknikkikkut, inuussutissarsiornikkut ilusilersuinissamullu tunngasut.

Kaj Egede, Qaqortup kommunalbestyrelsiani ilaasortaq ima saqqummiussivoq.

- Kujataani socialborgmestereqartariaqannginnerpugut? Kaj Egede aperivoq, nangillunilu:

- Kujataani teknikkikkut inuussutissarsiornikkullu borgmestereqartariaqannginnerpugut? Kulturikkut atuartitaanermullu borgmestereqartariaqannginnerpugut? Imatut paaseqqunngilarput akissaateqarlutik tamakkiisumik taakkua sulisunngornissaat, kisianni piffissap ilaannaatigulluunniit suliaqarlutik illoqarfimmi inissisimaffigisaminni inissisimallutik ataatsimiititaliani pineqartuni tunngasumik siuttutut inissisimallutik kujataa tamakkerlugu borgmesteriusussamut akisussaaffeqarlutik, Kaj Egede oqarpoq. Aningaasaqarnermut ataatsimiititaliaq sinnerlugu Kiista P. Isaksen saqqummiussivoq:

- Kommunini pingasuusuni ataatsimut kommuninngornissamut akileraarutinut procenti naleqqusssarneqassaaq. Ilutigalugu aningaasatigut pisussaaffiit pigisallu nalillit aningaasaqarneq eqarsaatigalugu ersarissarneqassapput, Kiista P. Isaksen oqarpoq, nangillunilu:

- Ataatsimoortumik kommuninngortussaq kommuniussaaq siammagaq, pingasunik pingaarnerusunik illoqarfittalik. Tamarmik ataasiakkaarlutik naligiimmik ingerlatsivinnik aqutsisoqarfillit, illoqarfinni ataasiakkaani suliassaqarfinni ingerlatsivinni immikkoortortaqarfiit kiffartuussiviillu attatiinnarneqartussaammata.

Kattunnissamut isumaqatigiissutip ilamernga Kiista P. Isaksen–imit taama saqqummiunneqarpoq. Isumaqatigiissut tamakkerlugu ualimut kommuninit pineqartunit atsioqatigiissutigineqarpoq.