Kommunit kattuffiat aaqqissuusseqqinnissaq pillugu piareersarpoq.

Aaqqissuuseqqinnissap atuutilernissaa sioqqullugu KANUKOKA-mi siulersuisut ataatsimiititalianik suleqatigiissitalianillu pilersitsipput. Taakku aaqqissuusseqqinnissami kommunit soqutigisaanik suliaqassapput.

Ataatsimiititaliaq immikkut ittoq KANUKOKA-p siulersuisuini borgmesterinik sisamanik ilaasortaatitalik kiisalu suliakkiissutit immikkut ittut pillugit suleqatigiissitat pilersinneqarput. Namminersornerullutik Oqartussat akisussaaffiisa kommuninut sukkanerusumik nussorneqarnissaat ilaatigut tassani nalilersorneqartassapput.

Ataatsimiititaliaq allaffissornerup aaqqissuuteqinnissaanik suliaqartussaatitaasoq tassunga atassaaq. Taakku saniatigut suleqatigiissitanik allanik killilimmik oqartussaaffilinnik KANUKOKA pilersitsilersaarpoq.

Ataatsimiititaliat suleqatigiissitallu katillugit qulingiluat pilersinneqassapput tamarmik immikkut allattoqarfeqartinneqassallutik.

Ataatsimiititaliani suleqatigiissitalianilu atorfilittassat ilaasortassallu sapaatip akunnerini tulliuttuni inuttaalersorneqassapput.